Almatyda dárigerler qorǵanys kostıýmderin ózderi tigip jatyr degen aqparat jalǵan
ALMATY. QazAqparat – Almaty qalalyq densaýlyq saqtaý basqarmasy jedel járdem qyzmetkerleri juqpaly indetke qarsy kıetin kostıýmderdi ózderi tigip alyp jatyr, – degen aqparatty joqqa shyǵardy, dep habarlaıdy QazAqparat tilshisi.
«Bul aqparat shyndyqqa janaspaıdy. Almaty qalasyndaǵy jedel járdem brıgadasy tolyqtaı jeke qorǵanys quraldarynyń barlyq túrimen jetkilikti mólsherde jabdyqtalǵan. Atap aıtqanda, búginde qalanyń medıtsınalyq stantsııalary men qosalqy stantsııalarynda 400-den astam medıtsınalyq kostıýmder bar. Jedel járdem brıgadasy jeke qorǵanys quraldaryn ár shaqyrýdan soń jańartyp otyrady. Arnaıy kólikterdi zalalsyzdandyrý jumystaryna keletin bolsaq, bul protsedýra sanıtarlyq-epıdemıologııalyq talapqa saı júzege asyrylady»,– delingen habarlamada.
