Almatyda dári tapshylyǵy bolmaıdy - ákimdik
ALMATY. QazAqparat – Almatyda dári tapshylyǵy bolmaıdy. Bul týraly onlaın brıfıng barysynda Almaty qalasy ákimdiginiń dárilik preparattarmen qamtamasyz etý jónindegi úılestirýshisi Zańǵar Sálimbaev aıtty, dep habarlaıdy QazAqparat tilshisi.
«Baqytjan Saǵyntaevtyń tapsyrmasy boıynsha, maýsym aıynda dári-dármekpen qamtamasyz etý maqsatynda qalada turaqtandyrý qory qurylǵan bolatyn. Oǵan jergilikti bıýdjetten 10 mlrd teńge bólindi. Qarajatty ekige bóldik. Dárihanalar jelisine 5 mlrd teńge, aýrýhanalar men klınıkalarǵa 5 mlrd teńge. Qańtardyń aıaǵyna deıin kelisim shartqa sáıke, dıstrıbıýtorlar 40 mln astam dári dármek jetkizý kerek. Búgingi kúni 33 mln preparat keldi. Onyń 18,4 mln qoımada tur», - dedi Zańǵar Sálimbaev.
Budan bólek, «SQ Farmatsııa» JShS-da turaqtandyrý qoryn qurdy. Onda eki aıǵa jetetin dári-dármek pen medıtsınalyq qorǵanys quraldary bar.
«Sonymen qatar, qaladaǵy medıtsına uıymdary qajetti dárilik zattarmen tolyq qamtamasyz etilgen. Dári tapshylyǵy bolmaıdy. Bizde birtutas júıe bar, oǵan sáıkes dárihanalar baqylanady. Biz qaı jerde jáne qansha dári qalǵanyn únemi qadaǵalap otyramyz», - dedi spıker.
