Almatyda dári-dármektiń turaqtandyrý qoryn qurý úshin 10 mlrd teńge bólindi
ALMATY. QazAqparat - Almatyda klınıkalar men dárihanalarda dári-dármek tapshylyǵynyń aldyn alý úshin birqatar jumystar atqarylyp jatyr. Bul týraly Ortalyq Kommýnıkatsııalar qyzmeti alańynda ótken brıfıngte Almaty ákimi Baqytjan Saǵyntaev aıtyp berdi, dep habarlaıdy QazAqparat tilshisi.
Baqytjan Saǵyntaevtyń aıtýynsha, turaqtandyrý qoryn qurý úshin 10 mlrd teńge bólindi. Onyń 5 mlrd teńge aýrýhanalar men emhanalardy dári-dármekpen qamtamasyz etýge, 5 mlrd teńge dárihanalardy dárilik preparattarmen úzdiksiz qamtamasyz etýge arnalǵan. Búgingi tańda 68 ataý boıynsha azaıtylmaıtyn 8 mln dárilik preparattyń qory bar.
Sonymen birge, jeke qorǵanysh quraldarynyń eki aılyq qory qurylǵan. 4,7 mln jeke qorǵanys quraldary bar, «SK-farmatsııadan» 4,6 mln jeke qorǵanys quraldary kelip túsedi. Sonymen qatar, qalada kúndelikti qýaty 1 mln birlikti quraıtyn medıtsınalyq maska óndirisi jolǵa qoıylǵan.
