Almatyda dári-dármekti arnaıy robottar taratatyn boldy
ALMATY. QazAqparat - Almatyda klıentterge robottar qyzmet kórsetetin bolady. Mundaı temir qurylǵylar jergilikti bıýdjet esebinen alynǵan dárilik zattardy taratý fýnktsııasyn atqarady, dep habarlaıdy QazAqparat tilshisi.
Bul týraly Sybaılas jemqorlyqqa qarsy kúres Ulttyq bıýrosy men prokýratýra ókilderiniń kezdesýinde aıtyldy.
Búginde Almatyda 134 medıtsınalyq mekeme jumys jasap tur. Onyń 77-si - memlekettik uıymdar. Azamattar medıtsınalyq kómektiń der kezinde sapaly kórsetilýimen qatar, dárimen qamtýǵa qatysty jıi shaǵymdanady.
Osy olqylyqtyń ornyn toltyrý maqsatynda memlekettik satyp alý jáne dárimen qamtý júıesiniń ashyqtyǵyn qamtamasyz etý qolǵa alyndy. Bul baǵytta arnaıy joba iske asyrylyp jatyr. Bolashaqta bıýdjet esebinen alynǵan dárilerdi robot taratady. Mundaı tehnıkalar Almaty onkologııalyq ortalyǵynda, balalar aýrýhanasynda, qalalyq revmatologııalyq ortalyqta ornalastyrylady.
«Dárihana robottary orfandy medıtsınalyq preparattardy jiberetin bolady. Dárilerdi bermes buryn robot patsıenttiń túr-tulǵasyn ajyratady. Patsıent týraly barlyq maǵlumat qorytylady. Jeke elektrondy karta ashylady. Tek dáriger jazyp bergen dári beriledi. Sonymen qatar, QR DSM aqparattyq júıelerimen ıntegratsııa jasalady. Osyndaı tehnıkany satyp alý boıynsha ekijaqty memorandýmǵa qol qoıyldy», - dedi qalalyq qoǵam densaýlyǵy basqarmasynyń basshysy Qanat Tósekbaev.
Qalada dárimen qamtý boıynsha baqylaýdy júrgizý baǵytynda turaqty jumys toby qurylǵan. Sonymen qatar, densaýlyq saqtaý salasyn qadaǵalaıtyn táýelsiz baqylaý keńesi bar.
