Almatyda dári-dármek pen betperde jetkilikti – Baqytjan Saǵyntaev
ALMATY. QazAqparat – Almatyda halyqaralyq standarttarǵa sáıkes koronavırýs ınfektsııanyń aldyn alýǵa arnalǵan naqty sharalar qabyldandy. Bul týraly qala ákimi Baqytjan Saǵyntaev jelidegi paraqshasynda jazdy, dep habarlaıdy QazAqparat tilshisi.
Qala basshysynyń aıtýynsha , áýejaı men temirjol vokzaldary arqyly týrıstik jáne mıgratsııalyq lek ótetindikten jolaýshylardy tekserý kúsheıtildi. Áýejaıda koronavırýs kúdigi bar aýrýlardy oqshaýlaý úshin arnaıy karantın palatalary ashylýda. Vırýs taraǵan óńirlerden ushyp kelgen barlyq reıster erekshe baqylaýǵa alynǵan.
Infektsııany ákelý men taratýdy eskertý boıynsha epıdemııaǵa qarsy jáne sanıtarlyq-profılaktıkalyq sharalardy júzege asyrýdyń vedomstvoaralyq jospary jasaldy. Almaty áýejaıynyń sanıtarlyq-karantındik pýnktimen birge oqý-jattyǵý sabaqtary ótti.
Qalanyń medıtsınalyq uıymdary men medıtsınalyq qyzmetkerleri koronavırýs ınfektsııasyna kúdiktelgen aýrýlardy qabyldaýǵa daıyn. Dári-dármektiń qajetti qory jetkilikti, olardyń ishinde paratsetamol, ıbýprofen, glıýkoza eritindisi, fızoeritindiler, prednızolon, deksametazon, geparın, kontrıka, sonymen qatar antıbakterıaldy jáne vırýsqa qarsy preparattar men dezınfektsııalyq zattar bar.
Qalanyń medmekemelerinde 690 myńnan astam, al rezervte 1,3 mln birrettik betperde bar.
Qalalyq ınfektsııalyq aýrýhanada 20 tósegi bar boks jáne jansaqtaý bólimi ashylǵan. Eger jaǵdaı kúrdelenetin bolsa, onda № 1 qalalyq klınıkalyq aýrýhanada qosymsha 200 tósek, № 2 balalar aýrýhanasynda 20 tósek qosymsha daıyndalatyn bolady.
Almaty boıynsha +7 (727) 382-35-36, 382-33-50 telefondary, Densaýlyq saqtaý mınıstrliginde 1406 nómiri boıynsha qaýyrt jeli uıymdastyrylǵan.
