Almatyda dári-dármek qoryn jasaqtaýǵa 5 mlrd teńge bólindi
ALMATY.QazAqparat - Almatyda dári-dármektiń jetkilikti qory bar. Bul týraly onlaın brıfıng barysynda Almaty qalasy dári-dármekpen qamtamasyz etý jónindegi úılestirýshisi, «Almaty Finance» basqarmasynyń tóraǵasy Tımýr Haırov aıtty, dep habarlaıdy QazAqparat tilshisi.
Onyń aıtýynsha, koronavırýsqa qarsy dárilik preparattardyń turaqtandyrý qory Almaty qalasy ákimdiginiń 2020 jylǵy shildedegi sheshimimen quryldy. Oǵan shamamen 5 mlrd teńge bólindi.
«Farmatsevtıkalyq kompanııalar 47 mln birlikten astam dárilik quraldar jáne 68 pozıtsııa boıynsha medıtsınalyq buıymdar satyp alýdy júzege asyrdy. Shamamen 27 mln birlik dárilik quraldar Almaty qalasynyń dárihanalaryna jetkizildi jáne qoımalarda shamamen 20 mln preparat bar, onyń 8 mln preparaty azaıtylmaıtyn qaldyqty quraıdy»,- deıdi Tımýr Haırov.
Sonymen qatar, ol qalanyń aýdan ákimdikteri KVI-di emdeý hattamasyna kiretin 22 negizgi pozıtsııa boıynsha 375 dárihanaǵa júıeli túrde monıtorıng júrgiziletinin atap ótti.
«Bıylǵy jyldyń 21 qańtarynda kardıomagnıl 150 mg №100 jáne kardıomagnıl 75 mg №100 preparattaryna jańa shekti baǵalar bekitilgen. Atalǵan ózgerister qalǵan dárilerdiń qaıta baǵalaýyn júrgizý, kóterme satý dıstrıbıýtorlarymen jáne bólshek satý jelilerimen qaıta sharttar jasasý qajettigine baılanysty, búkil Qazaqstan boıynsha dárihana jelilerine keıbir preparattardyń jetkiziliminiń ýaqytsha qıyndyqtaryn týdyrdy. Jekeleı alǵanda, Kardıomagnıl preparaty jetkizilimniń ýaqytsha kidiristeri boldy. Biraq, qala dárihanalarynda «Atsetılsalıtsıldy qyshqyl» halyqaralyq patenttelmegen ataýymen sondaı basqa da preparattar boldy. Olar Trombopol NEO, Ass trombın, Trombo ASS jáne basqa da osy sekildi dáriler»,-deıdi spıker.
«Emıtı», «Zerde» kóterme kompanııalar qazir kardıomagnıldyń jańa shekti baǵalaryna sáıkes shamamen 11 myń oramyn aldy jáne olardy bólshek satý úshin Almaty qalasynyń dárihanalaryna jetkizýde. «Emıtı» kompanııasy preparatty 1 dárihanamen qatar, jeke dárihana jelisi arqyly da bólshek satýmen aınalysatyn 77 zańdy tulǵaǵa, «Zerde» 43 zańdy tulǵaǵa jóneltti.
