Almatyda dári-dármek qory jetkilikti

ALMATY. QazAqparat - Almatyda dári-dármek qory kem degende eki aıǵa jetedi. Bul týraly qalalyq kásipkerlik jáne ınvestıtsııalar basqarmasynyń basshysy Erkebulan Orazalın Almatynyń tynys-tirshiligin qalpyna keltirý jónindegi qalalyq shtab otyrysynda málim etti, dep habarlaıdy QazAqparat tilshisi.

Almatyda 975 dárihana bar, onyń ishinde 920 shtattyq rejımde jumys istep tur.

Erkebulan Orazalınniń aıtýynsha, búginde onyń barlyǵy qajetti dári-dármekpen jáne medıtsınalyq maqsattaǵy buıymdarmen tolyq qamtamasyz etilgen.

«Bıyl turaqtandyrý qory arqyly dárilik zattardy satyp alý tetigi uzartyldy. Osylaısha, qalanyń bólshek saýda jelileri úshin negizgi jetkizýshiler «Inkar» JShS, «MFK BIOLA» JShS jáne «KFK Medservıs Plıýs» JShS. Olarmen satyp alý úshin shart jasaldy. Jetkiziletin taýardyń jalpy kólemi - 9,2 mln teńge, - dedi kásipkerlik jáne ınvestıtsııalar basqarmasynyń basshysy.

Sonymen qatar, ol osy kompanııalardyń qoımasyndaǵy dárilik zattar men medıtsınalyq maqsattaǵy buıymdardyń jalpy qaldyǵy 15,5 mln ekenin aıtty.

Sondaı-aq, kóterme jetkizýshiler men qalanyń bólshek saýda jelilerinde dári-dármektiń shamamen 2 aı merzimge jetkilikti qor bar.