Almatyda dári baǵasy jyl sońyna deıin qymbattamaıdy
ALMATY. QazAqparat - Almaty ákimdigi men Qazaqstannyń farmatsevtıkalyq qaýymdastyqtary, QR Densaýlyq saqtaý mınıstrligi Farmatsııa komıtetiniń departamenti ózara túsinistik týraly memorandýmǵa qol qoıdy.
Quzyrly organdar bıyl dári-dármek baǵasyn kótermeý týraly ýaǵdalastyqqa keldi, dep habarlaıdy QazAqparat tilshisi.
Qalalyq Densaýlyq saqtaý basqarmasynyń baspasóz qyzmetinen habarlaǵandaı, atalǵan sharadaǵy basty maqsat áleýmettik turǵydan az qorǵalǵan adamdarǵa dári-dármek baǵasyn qoljetimdi etý bolyp tabylady.
Sarapshylar júrek jáne asqazan aýrýlary, qabynýǵa qarsy, jansyzdandyratyn, asqazan jáne qan qysymyn tómendetetin dárilerdiń, kóz jáne qulaq tamshylarynyń, sondaı-aq dárýmenderdiń baǵasyn turaqty etý týraly sheshim shyǵardy.
Tómen baǵalar jyldyń sońyna deıin saqtalatyn boldy.
«Otandyq jáne sheteldik óndirýshilerdiń dıstrıbıýtorlary, bólshek saýda qatysýshylary barlyǵy 105 dári túrine baǵany burynǵy deńgeıde saqtap qalýǵa áleýmettik jaýapkershilik aldy», - dep atap ótti basqarmadan.
Arzan dárilerdiń tizimin QR DSM Farmatsııa komıteti departamentiniń www.dkkmfd.kz saıtynan jáne qalalyq densaýlyq saqtaý basqarmasynyń www.almatyzdrav.kz saıtynan kórýge bolady.
Qala dárihanalarynda dári baǵasynyń negizsiz kóterilgenin baıqaǵan turǵyndar quzyrly organdarǵa habarlasa alady.
