Almatyda dárethana shuńqyrynan tabylǵan sábı áli jansaqtaý bóliminde jatyr
ALMATY. QazAqparat - Almatyda polıtsııa qyzmetkerleri aman alyp qalǵan shaqalaqtyń jaǵdaıymen tanysty, dep habarlaıdy Polisia.kz.
Qutqarylǵan sábıdi kórýge aýrýhanaǵa polıtsııa qyzmetkerleri Nurjan Shatýnov pen Ǵazız Hamasqalıev baryp qaıtty.
Dárigerler onyń jaǵdaıyn birqalypty aýyr dep otyr.
– Áriptesterimizben birge sábıdi «Batyr» dep atap kettik, onyń ómiri úshin úzdik dárigerlerdiń kúresip jatqandyǵyn bilemiz. Olarǵa kóp raqmet. Balaqaı qazir jansaqtaý bóliminde jatyr, oǵan qajetti zattardy alyp keldik. Sábıge zor densaýlyq, uzaq ǵumyr tileımiz, – dedi Túrksib aýdandyq polıtsııa basqarmasynyń kámeletke tolmaǵandar isteri jónindegi ýchaskelik ınspektory Nurjan Shatýnov.
Eske sala keteıik, 25 tamyz kúni Almatyda polıtseıler dárethana shuńqyrynan jańa týǵan náresteni alyp shyqqan edi.
17 jastaǵy kelinshek túsik boldy dep shaǵymdanyp, sábıinen qutylǵan.
Alaıda tártip saqshylary sábıdi dárethana shuńqyrynan taýyp aldy.
Keıinnen dárethana shuńqyrynan náresteni alyp shyqqan polıtseıge maıor sheni berildi, al ekinshi polıtseı aqshalaı syıaqy aldy.
Foto: polisia.kz
