Almatyda dańqty qolbasshy Baýyrjan Momyshulyna eskertkish ashyldy
ALMATY. 10 jeltoqsan. QazAqparat /Názıra Eleýhan/ - Búgin Almatyda 28 panfılovshylar atyndaǵy saıabaqta Uly Otan soǵysyna qatysýshy, dańqty qolbasshy, Keńes Odaǵynyń Batyry Baýyrjan Momyshulyna eskertkish ashyldy.
Eskertkishtiń ashylý saltanatyna Almaty qalasy ákiminiń orynbasary Serik Seıdýmanov, batyrdyń uly Baqytjan Momyshuly, ǵalymdar men qoǵam qaıratkerleri jáne batyrdyń týǵandary men týystary qatysty.
Monýmenttiń jalpy bıiktigi 6 metr. Eskertkish qoladan quıylǵan, al tuǵyry granıtten qashalǵan. Monýment avtorlary - qazaqtyń tanymal sáýletshileri Nurlan Dalbaı men Rasýl Satybaldıev.
Saltanatty sharaǵa qatysýshylar: «Momyshuly tarıhty qanymen de, qalammen de jazǵan. Baýyrjan Momyshuly halqyn jaýdan qorǵady, halyq batyr ulyn qaharman retinde tanydy, ol ulttyq batyrǵa aınaldy. Momyshulynyń qujattarynda onyń barynsha talapshyl, jigerli, batyl ekendigi, bilikti komandır men myqty uıymdastyrýshy bolǵandyǵy anyq jazylǵan»,- dep atap ótti.
Batyrdyń uly Baqytjan Momyshuly ákesiniń ózin bala kezden bastap Otandy súıýge, halqyn qasterleýge tárbıelegendigin tebirene aıtty.
Almaty ákiminiń orynbasary Serik Seıdýmanov: «bul eskertkish tek Baýyrjan Momyshulyna ǵana emes, jalpy Uly Otan soǵysyna qatysqan barlyq bozdaqtarǵa qoıylǵan eskertkish»,- dedi.
28 gvardııashy-panfılovshylar saıabaǵy - kópshilik jıi keletin súıikti oryndardyń biri. Batyrǵa ornatylǵan eskertkish jas urpaqty patrıotızm rýhynda tárbıeleýge yqpal eteri sózsiz.
