Almatyda dámhanany órt shaldy
ALMATY. QazAqparat- Búgin Almatyda "ARAGOSTA CAFE" dámhanasyn órt shaldy. Bul týraly jańa ǵana Almaty qalalyq TJD resmı ókili Sandýǵash Baımuhanbetova málim etti.
Onyń aıtýynsha, búgin tańǵy saǵat 05:25-te Almaty qalalyq TJD «101» kezekshi bólimine bir kýágerden Almaly aýdany, Rozybakıev kóshesi 72 «B» mekenjaıynda ornalasqan "ARAGOSTA CAFE" dámhanasy shatyrynyń janyp jatqany týraly habar kelip túsken.
«Órt sóndirýshilerdiń alǵashqy toby oqıǵa ornyna 5 mınýttan keıin kelip jetti. Belgili bolǵanyndaı, dámhana shatyrynyń kóp bóligin jalyn sharpyǵan. Sonyń saldarynan búkil shatyrdyń janyp ketýi jáne órttiń japsarlas ornalasqan kórshi ǵımaratqa ótip ketý qaýpi týyndady. Onyń ústine ókinishke qaraı, dámhana tóbesiniń janǵysh mıneraldyq maqtamen qymtalǵany órttiń tez taraýyna sebep boldy. Sondaı-aq, órt sóndirýshiler oqıǵa ornynan shashylyp jatqan birneshe órt sóndirgishti tapty. Sóıtse, ǵımarattyń kúzetshisi órtti tańǵy saǵat 04:45-te baıqapty. Sóıtip, óz kúshimen sóndirmek bolǵan. Órt sóndirý barysynda 50 lıtrlik 3 gaz jáne 2 kómirqyshqyl ballony qaýipsiz aımaqqa shyǵaryldy», - dedi S. Baımuhanbetova.
Qazir órt aýmaǵy naqtylanyp jatyr. Órttiń jaıylyp ketý qaýpi seıildi. Tilsiz jaý 06 saǵat 43 mınýtta aýyzdyqtaldy.
