Almatyda dámhanada urys shyǵyp, qyzdar pyshaqtasty
ALMATY. QazAqparat – Almatyda dámhanada janjal shyǵyp, qyzdardyń biri ekinshisin pyshaqtaǵan, dep habarlaıdy QazAqparat tilshisi.
Aldymen aqparat áleýmettik jelide tarady. Jábirlenýshi qyzdyń atynan aıtylǵan oqıǵa Instagram-daǵy pablıkterdiń birinde jarııalandy.
«Meniń atym Bota. Qazir aýrýhanada pyshaq jaraqatymen jatyrmyn. 4 qyrkúıekte jaqyn qurbylarym kóp ýaqyttan beri dámhanaǵa jınaldyq. Birazdan soń qurbym ekeýmiz syrtqa shyqtyq. Sol kezde 31 jastaǵy Aıgerim Baqytjanqyzyn kórdik (laqap aty Aıka-Major). Bir ýaqytta biz otyrǵan kabınaǵa Aıka Major kelip áńgimege tartyp, daýlasa bastady. Mazamdy almaýyn suradym. Birneshe sekýndtan soń arqamnan birneshe ret pyshaq saldy. Qan aǵyp, qulap tústim», - delingen jazbada.
Belgili bolǵandaı, kúdikti oqıǵa ornynan taıyp turǵan, al jábirlenýshi aýyr halde aýrýhanaǵa jetkizildi.
Qylmys Medeý aýdanyndaǵy dámhanalardyń birinde bolǵan.
«Kúdikti ustaldy. Urys kezinde 2 ret pyshaq salǵan. Bul derek boıynsha sot-medıtsınalyq saraptama taǵaıyndaldy. Sonyń nátıjesinde keltirilgen jaraqattyń aýyrlyǵy anyqtalyp, quqyqtyq baǵa beriledi», - dedi qalalyq Polıtsııa departamentiniń resmı ókili Saltanat Ázirbek.
