Almatyda dámhana órtendi
ALMATY. QazAqparat – Almatyda órt sóndirýshiler órtengen dámhanadaǵy jarylystyń aldyn aldy, dep habarlaıdy QazAqparat tilshisi.
Órttiń vıdeosy áleýmettik jelide taralǵan.
«14 qyrkúıekte túngi 01-15 shamasynda Túrksib aýdanynyń órt sóndirýshileri Súıinbaı 567 mekenjaıynda órtengen dámhanany sóndirýge attandy. Olar kelgende «Kahýrı» dámhanasy men onyń qasyndaǵy jazda otyratyn oryn órtenip jatqan. Tilsiz jaý ǵımarattyń shatyryn sharpyp úlgergen. Dámhananyń ishki qabyrǵalary aǵashtan jasalǵandyqtan órt jyldam tarap ketken. Jaqyn aradaǵy úılerdi órtten saqtaý maqsatynda eki top jumys istedi. Ǵımarat ishinen 50 l úlken gaz ballony shyǵaryldy. Sonyń arqasynda jarylystyń aldyn aldyq», - dedi Almaty TJD.
Qyzyl jalyn 24 mınýt ishinde 465 sharshy metr aýmaqty sharpyp úlgergen. Tótenshe jaǵdaıdan eshkim zardap shekpegen.
TJD elektr energııasyn tasymaldaıtyn symdardy jıi jańartyp turýǵa keńes berdi.
