Almatyda Daewoo Damas kóligin urlaýmen aınalysqan qylmystyq top ustaldy
ALMATY. QazAqparat- Almatylyq polıtseıler kólik urlaýmen aınalysqan qylmystyq topty ustady, dep habarlaıdy QazAqparat tilshisi.
Olar qymbat markaly kólikterdi emes, tek Daewoo Damas avtokólikterin urlaýmen aınalysqan. Kúdiktiler mashınany bólshekterge bólip satqan.
Jedel-izdestirý sharalary barysynda kúdiktiler anyqtalyp, ustaldy.
«Áńgime Jambyl oblysynyń 32 jastaǵy turǵyny jáne 1973, 1969 jáne 1988 jyly týǵan urlanǵan zattardy satyp alýshylardyń úsheýi týraly bolyp otyr. Kúdiktiler túnde qulypty ashyp, qozǵaltqyshty iske qosý úshin arnaıy quraldardy qoldanyp, Daewoo Damas kólikterin urlap ketkeni anyqtaldy. Urlanǵan kólikterdiń shyǵyny birneshe mıllıon teńge»,- deıdi Almaty qalalyq PD krımınaldyq polıtsııa basqarmasynyń bastyǵy Erkin Іńkárov.
Bólshektelgen kólik quraly Almaty oblysy, Qaskeleń qalasyndaǵy úılerdiń biriniń aýlasynan tabyldy. Kóptegen kólikten qozǵaltqysh pen kýzov nómirlerin alyp tastaǵan. Keıbireýleri jaı bólshektelip, qosalqy bólshekterge satylǵan.
Kúdiktilerge qatysty qylmystyq is QR QK 188-baby 1-bóligi boıysha qozǵaldy.Tergeý amaldary júrip jatyr.
Sonymen qatar, kúdiktilerdiń basqa da osyǵan uqsas qylmystarǵa qatystylyǵy tekseriledi.
