Almatyda dabyl sırenalary iske qosylyp, karantın týraly habarlandy
ALMATY. QazAqparat – Almatyda qala ákimi Baqytjan Saǵyntaevtyń halyqqa arnaǵan úndeýinen keıin shahardaǵy barlyq dabyl sırenalary iske qosylyp, jalpyqalalyq masshtabtaǵy tótenshe jaǵdaı týraly habarlandy.
QazAqparatqa qalalyq Tótenshe jaǵdaılar departamentinen málim etkendeı, bul, halyqty qulaqtandyrý úshin jasaldy.
«Almatyda 17 naýryz kúni, keshki saǵat 17:30 shamasynda dabyl qosyldy. Bul shara karantın rejıminiń engizilýine baılanysty halyqqa aqparatty jetkizý úshin jasaldy», - dedi TJD baspasóz qyzmetinen.
Dabyl soǵylǵan soń barlyq radıo jáne telearnalar arqyly aýdıohabarlama taratyldy.
Aıta ketý kerek, Almaty men Nur-Sultan qalalarynda karantın rejımi 19 naýryzda túngi saǵat 00:00-de engiziledi.
Azamattar men avtokólikterdiń qalaǵa kirip-shyǵýyn shekteý úshin 27 beket ornatylady.
Almaty ákimi Baqytjan Saǵyntaevtyń aıtýynsha, karantın qala turǵyndarynyń qaýipsizdigi úshin jasalyp otyr.
«Tótenshe jaǵdaı kezinde barlyǵymyz birigýimiz kerek. Bul jaǵdaıda ár azamattyń tártibi men oı sanasy óte mańyzdy. Mundaı qıyndyqtan bizdi tek birligimiz ben bir-birimizge qoldaýymyz, tártiptiligimiz ǵana alyp shyqpaq. Biz qıyndyqty jeńemiz!», - dedi ol.
