Almatyda D. Turlyhanovtyń júldesi úshin grek-rım kúresinen respýblıkalyq týrnır bastaldy (FOTO)
ALMATY. QazAqparat - Búgin Almatyda «Dostyq» sport kesheninde KSRO-ǵa eńbek sińirgen sport sheberi, Qazaqstanǵa eńbek sińirgen jattyqtyrýshy, Seýl Olımpıadasynyń kúmis júldegeri Dáýlet Turlyhanovtyń júldesi úshin grek-rım kúresinen 1999-2000 jyldary týǵan jasóspirimder arasynda dástúrli XVII-shi Respýblıkalyq týrnır bastaldy.
Jarystyń ashylý saltanatynda eń aldymen sóz alǵan Dáýlet Bolatulynyń anasy Márzııa apa jınalǵan qaýymǵa búgingi jarysty tamashalaýǵa kelgendikteri úshin rızashylyǵyn bildirip, jas balýandarǵa sáttilik tiledi.
«Bizdiń otbasy úshin boz kilemniń orny erekshe. Dáýletim 6-shy synyptan bastap kúrespen myqtap aınalysa bastady. Talaı shyńdardy baǵyndyrdy. Qazaqstannyń álemge tanylýyna Dáýletimniń de eńbegi bar. Bul úshin árıne onyń jattyqtyrýshylaryna aıtar alǵysym sheksiz. Jas balýan balalaryma sáttilik tileımin. Dáýletimniń jolyn bersin!», - dedi Márzııa Turlyhanova.
Óz kezeginde grek-rım kúresinen Máskeý Olımpıadasynyń chempıony Jaqsylyq Úshkempirov osyndaı týrnırlerdi uıymdastyrýdyń mańyzdylyǵyna toqtaldy.
«Biz daryndy, jas balýandardy daıyndaýymyz kerek. Olar jaıdan-jaı paıda bola salmaıdy. Bul úshin osyndaı týrnırler óte qajet. Bolashaq Olımpıada chempıondary osyndaı jarystarda shyńdalady. Sondyqtan jas balýandarǵa jáne aldaǵy Rıo Olımpıadasyna baratyn balýandarǵa sáttilik tileımin. Altynnan alqa taǵatyndaryna úmit artamyn», - dedi J. Úshkempirov.
Al týrnır ıesi, dańqty balýan Dáýlet Turlyhanov búgingi jarys jas balýandardyń toıy ekendigin jetkizdi.
«Biz osyndaı jarystarda shyńdaldyq. Jeńiske degen qushtarlyǵymyz artyp, azamat bolyp óstik. Elimizde áli talaı chempıondar shyǵady dep senemin. Grek-rım kúresi - kúrestiń ishindegi eń ádemisi. Kezinde Qajymuqan babamyz da klassıkalyq frantsýz kúresimen aınalysyp, aty álemge tanyldy. Elimizde birinshi Olımpıada chempıony Anatolıı Kolesov, eki dúrkin Olımpıada chempıony Valerıı Rıazantsev, Olımpıada chempıondary Jaqsylyq Úshkempirov, ıÝrıı Melnıchenko barlyǵy da grek rım kúresiniń balýandary. Sondyqtan, Olımpıadanyń jeńis tuǵyryna áli talaı dańqty balýandyrymyz shyǵatyna senemin», - dedi D. Turlyhanov.
Búgingi jarysqa barlyq 14 oblys pen Astana, Almaty, Túrkistan, Jarkent, Pavlodar qalalarynan quramynda 240 balýan bar 24 komanda qatysýda. Ár komandada 10 balýannan bar. Eki kúnge sozylatyn jarysta olar 42 keli, 46 keli, 50 keli, 54 keli, 55 keli, 63 keli, 69 keli, 76 keli, 85 keli jáne 100 keli salmaq dárejelerinde óner kórsetetin bolady.
Jeńimpazdar dıplomadr, gramotalar jáne baǵaly syılyqtarmen marapattalady.
