Almatyda D.Qonaevtyń 100 jyldyǵyna arnalǵan mereıtoılyq shara qaıratkerdiń eskertkishine gúl shoǵyn qoıýdan bastaldy
ALMATY. 12 qańtar. QazAqparat /Erlik Erjanuly/ - Búgin Almatyda kórnekti memleket jáne qoǵam qaıratkeri Dinmuhamed Qonaevtyń 100 týǵanyna jyl tolýyna arnalǵan mereıtoılyq sharalar ótýde.
Qala turǵyndary men qonaqtary ony D.Ahmetulynyń 1978 jyly ornatylǵan eskertkish bıýstine gúl shoǵyn qoıyp, 1 mınýt únsizdik jarııalaýmen bastady. Úsh márte Sotsıalıstik Eńbek Eri atanǵan Dinmuhammed Ahmetuly Qonaevtyń bul qola músin músinshi T. Dosmaǵambetovtyń úlgisi boıynsha jasalǵan edi. Bıiktigi 4,59 metr bolatyn bul músin tegistelgen granıt tuǵyrǵa qoıylǵan. Aǵymdaǵy jyly oǵan mereıtoıǵa oraı jóndeý jumystary júrgizilgen bolatyn.
Qazaq KSR Ǵylym akademııasynyń akademıgi, tehnıka ǵylymynyń doktory D. Ahmetuly 1912 jyly 12 qańtarda ómirge kelip, 82 jasqa qaraǵan shaǵynda, 1993 jyly tamyzdyń 22-de ómirden ozǵan edi. Máskeý Tústi metall altyn ınstıtýtyn bitirgen soń eńbek jolyn Balqash mys qorytý kombınatynyń Qońyrat rýdnıginde bastady. Onda burǵylaý stanogynyń mashınısi, tseh bastyǵy, rýdnıktiń bas ınjeneri jáne onyń dırektory bolady. Ekinshi dúnıejúzilik soǵystyń qıyn-qystaý kúnderinde ol tyldaǵy jumysty uıymdastyrýda iskerligimen kózge túsip, «Altaıpolımetall» kombınaty bas ınjeneriniń orynbasary, Rıdder rýdnıginiń jáne KSRO qorǵasyn myrysh ónerkásibiniń eń iri kásiporyndarynyń biri Lenınogor ken basqarmasynyń dırektory qyzmetterin atqarady. Al 1942-52 jyldary Qazaq KSR Mınıstrler Keńesi tóraǵasynyń orynbasary bolyp jumys jasap, Qazaq KSR Ǵylym akademııasynyń akademıgi jáne onyń prezıdenti bolyp saılandy. Odan keıin 1955-60, 1962-64 jyldary Qazaq KSR Joǵarǵy Keńesiniń tóraǵasy, 1960-62 jáne 1964-86 jyldary Qazaqstan kommýnıstik partııasynyń Ortalyq komıtetiniń birinshi hatshysy boldy.
