Almatyda D.Qonaevtyń 100 jyldyǵyna arnalǵan fotoalbom jaryq kórdi

Atalmysh basylymynyń resmı tusaýkeseri 2012 jyldyń 5 qańtarynda bolady.

Fotoalbom eksklıýzıvti basylym bolyp tabylady. Oǵan buǵan deıin esh jerde jarııalanbaǵan otbasylyq muraǵattaǵy sýretter engen. Kitap betterinen Dinmuhamed Qonaevtiń HH ǵasyrdaǵy belgili tarıh tulǵalarymen jáne saıasat qaıratkerlerimen, sondaı-aq, jaqyn týystarymen demalys kezderinde túsken sırek sýretterdi kórýge bolady. Sonymen qatar, fotoalbomnan qaıratkerdiń sońǵy jyldary turǵan úıiniń sýreti, marapattary men shetel memleket basshylarynyń bergen syılyqtary, onyń jınaǵan qarý-jaraq kollektsııalarynyń fotosýretteri engizilgen.

Albom "Halyqtyń máńgilik jadynda" degen bólimmen aıaqtalady. Oǵan Dinmuhamed Qonaevqa qoıylǵan eskertkishterdiń, uly tulǵanyń qurmetine atalǵan mektep, joǵarǵy oqý oryndary men kóshelerdiń sýretteri, sondaı-aq, qylqalam sheberleriniń qaıratkerge arnaǵan týyndylarynyń sýretteri engen.

Kórnekti memleket jáne qoǵam qaıratkeri, úsh márte Sotsıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymynyń doktory, KSRO shet el ordenderi men medaldarynyń ıegeri Qonaev Dinmuhamed Ahmetuly 1912 jyly qańtardyń 12-i kúni Almaty qalasynda ómirge kelgen. Keńes jyldary 20 jyldan astam ýaqyt boıy respýblıkany basqardy.