Almatyda D. Qonaevty eske alý aptalyǵy bastaldy
ALMATY. 15 tamyz. QazAqparat /Erlik Erjanuly/ - Búgin Almatyda kórnekti memleket jáne qoǵam qaıratkeri Dinmuhamed Qonaevtyń qaıtys bolǵanyna 18 jyl tolýyna baılanysty «Eske alý aptalyǵy» bastaldy.
Ony D. Qonaev murajaı-úıi uıymdastyryp otyr. Búgin onda «Balalar ekskýrsııa júrgizedi», «Murajaıǵa jádigerler syıla» aktsııalary men «Qonaevtyń muraǵattyq qujattary» kórmesi ashyldy.
«Aptalyq kezinde D.Qonaev ýnıversıteti, Halyqaralyq D. Qonaev qory, D. Qonaev atyndaǵy taý-ken ınstıtýty, D. Qonev atyndaǵy Úlken Almaty arnasy kúnderi men taqyryptyq ekskýrsııalar júrgiziledi. Bıyl tamyzdyń 22-si kúni 3 dúrkin Sotsıalıstik Eńbek Eri, QR UǴA akademıgi, tehnıka ǵylymynyń doktory Dinmuhamed Ahmetulynyń qaıtys bolǵanyna 18 jyl tolady. Sol sebepti bul kúni marqumnyń Keńsaıdaǵy zıratyna jáne Almatydaǵy eskertkishine gúl shoqtary qoıylyp, murajaıda jańa jádigerler kórmesi ashylady», - deıdi D. Qonaev murajaı-úıiniń bas qor saqtaýshysy Gúlmıra Bekmuratova. Onyń aıtýynsha, eske alý sharalary odan keıin de óz jalǵasyn taýyp 23-inde «Qonaev ottyqtary», 24-inde «Qonaevtyń albomdary men jańa fotosýretteri», 25-inde «D. Qonaevqa memleketter basshylarynyń kádesyılary» kórmeleri bolady. Sondaı-aq D.Ahmetulynyń 75, 80 jyldyqtaryna oraı túsirilgen fılmder kórsetiledi. Al 26-tamyzda Almaty-Úlken Almaty arnasy» marofony, «D.Qonaev- ǵasyr adamy» dep atalatyn konferentsııa jáne «Úlken Almaty arnasy - ǵasyr qurylysy» kórmesi men arnaıy fılmniń kórsetilimi bolady.
