Almatyda D. A. Qonaevtyń páter-murajaıynda «El aǵasy – máńgi el esinde» foto-ekspozıtsııasy ashyldy
ALMATY. QazAqparat - Búgin Almatyda Dinmuhamed Qonaevtyń memorıaldyq páter-murajaıynda «El aǵasy - máńgi el esinde» atty foto-ekspozıtsııa ashyldy.
22 tamyz - kórnekti memleket qaıratkeri, KOKP OK Saıası Bıýrosynyń múshesi, Qazaqstan Kompartııasy Ortalyq Komıtetiniń birinshi hatshysy, Qazaq KSR Ǵylym akademııasynyń akademıgi Dinmuhamed Ahmetuly Qonaevty eske alý kúni.
Osyǵan baılanysty, búgin D.A. Qonaev gúlbaǵyndaǵy eskertkishke gúl shoqtaryn qoıý rásimi boldy. Oǵan D. Qonaevtyń týǵan-týystary, birge qyzmettes bolǵan áriptesteri, qoǵam qaıratkerleri, olardyń ishinde Keńes Aýhadıev, UOS ardagerleri, tyl eńbekkerleri, jáne qala turǵyndary qatysty.
Budan keıin, D. Qonaevtyń páter-murajaıynda «El aǵasy - máńgi el esinde» foto-ekspozıtsııasy ashyldy. Keıin, D. Qonaev turǵan páter-murajaıǵa jáne D. A. Qonaev mýzeıine ekskýrsııa jasaldy.
Aıta ketelik, Dinmuhamed Ahmetuly eren eńbegi úshin úsh márte Sotsıalıstik Eńbek Eri atanǵan. Sonymen qatar, Dımash Ahmetuly Keńes Odaǵynyń jáne birqatar shet elderdiń (Mońǵolııa, Kýba, Qytaı, Chehoslovakııa) orden-medaldarymen marapattalǵan.
