Almatyda COVID-19 ekinshi tolqynyna 5500 medıtsına kadrynan rezerv quryldy

Bul týraly Almaty qalasynyń Óńirlik kommýnıkatsııalar qyzmeti alańynda ótken onlaın-suhbat barysynda Joǵary medıtsınalyq kolledjdiń dırektory Svetlana Sultanǵazıeva aıtty, dep habarlaıdy QazAqparat tilshisi.

Koronavırýs ınfektsııasynyń taralýynyń aldyn alý úshin densaýlyq saqtaý júıesin damytýdyń barlyq baǵyttary boıynsha keshendi jumystar júrgizilip jatyr.

«Ýaqtyly dári-dármekpen qamtamasyz etý, klınıkalardyń materıaldyq-tehnıkalyq jabdyqtalýy, ınfektsııalyq tósek-oryndardy ulǵaıtý jáne taǵy basqa áleýmettik-ekonomıkalyq máselelerden basqa, densaýlyq saqtaý uıymdaryn medıtsına kadrlarymen qamtamasyz etýge erekshe kóńil bólindi», - dedi ol.

Almaty qalasynda qoǵamdyq densaýlyq saqtaý basqarmasyna qarasty 74 uıym, 20 respýblıkalyq uıym jáne 93 jekemenshik nysanyndaǵy uıym jumys isteıdi. Bul uıymdarda 38 myńnan astam qyzmetker bar.

Medıtsına kadrlarymen qamtamasyz etý máselesi boıynsha COVID-19–ben kúreske 27 densaýlyq saqtaý uıymy jumyldyrylyp, 6200-ge jýyq tósek-oryn ornalastyrylǵany aıtyldy. Sol kezde ınfektsııalyq statsıonarlarda 4035 qyzmetker eńbek etti.

Epıdemııalyq jaǵdaıdyń turaqtalýyna baılanysty kópsalaly klınıkalar qalypty rejımge kóshti.

Juqpaly aýrýlar klınıkalarynda koronavırýs juqtyrǵan 100-den astam naýqas bar. Onda 400-ge jýyq dáriger men medbıke, kishi medıtsınalyq personal shtattyq rejımde eńbek etip jatyr.

«Jańa tolqyn» jaǵdaıynda 5500-ge jýyq medıtsınalyq kadr rezervte tur. Medıtsınalyq joǵary oqý oryndarynyń oqytýshylary, rezıdentteri men dáriger ınternderinen rezerv qalyptastyryldy, olardyń sany 450-ge jýyq», - dedi Svetlana Sultanǵazıeva.