Almatyda COVID-19 anyqtaıtyn jetinshi zerthana ashyldy
ALMATY. QazAqparat – Almaty COVID-19 ınfektsııasyna skrınıng júrgizetin jetinshi zerthana ashyldy, dep habarlaıdy QazAqparat tilshisi.
Almaty ákimi Baqytjan Saǵyntaev «Atakent» ortalyǵyndaǵy koronavırýs ınfektsııasyn joǵarǵy dáldikpen anyqtaıtyn PTR dıagnostıkasy bar modýldik zerthana kesheniniń tusaýkeserine qatysty.
«COVID-19 anyqtaý múmkindigin keńeıtip jatyrmyz. Joǵary tehnologııalyq zerthanany B.Ótemuratov atyndaǵy qor qala ákimdigine tabystady. Munda múmkindigi shekteýli adamdarǵa, jumyssyzdarǵa, kópbalaly, az qamtylǵan otbasylarǵa, josparly gospıtalızatsııaǵa baǵyttalǵan, jasy 50 asqan adamdarǵa, tynys alý joldary men júrek aýrýy bar azamattarǵa, epıdemııaǵa qarsy jumysqa jumyldyrylǵan azamattarǵa skrınıng jasalady. Osynyń arqasynda Almatyda koronavırýs ınfektsııasynyń taralýyn shekteýge bolady»,- dep jazdy ákim Instagram-daǵy paraqshasynda.
Bul - Almatydaǵy jetinshi zerthana kesheni.
Almatyda koronavırýs ınfektsııasyn anyqtaıtyn 6 zerthana jumys istep tur. Biraq olardyń barlyǵynda testileý aqyly.
