Almatyda combo-store MINISTOP ashyldy
ALMATY. 17 qańtar. QazAqparat - Búgin Almatyda RTS-MINISTOP kompanııasy japondyq MINISTOP saýda belgisimen alǵashqy kombo-stordy (combo-store) ashty.
Kombo-stor - bul óte jaqyn jerde ornalasqan dúkender men fastfýd kafeterıılerdi biriktiretin dúkenderdiń Qazaqstan úshin múldem jańa túri.
«Úı janynda» ornalasqan dúkenderdiń túrin damytyp otyrǵan alǵashqy jeli retinde RTS-MINISTOP kompanııasynda tabysqa jetýge qajetti alǵysharttardyń bári bar. Kompanııa aldyna kem degende 15 jyldy qamtıtyn uzaq merzimdi jospardy qoıyp otyr. Sondaı-aq, onyń qarjylyq qoldaýy myqty jáne Japonııa men Ońtústik-Shyǵys Azııa naryqtarynda jınaqtaǵan kóp jyldyq tájirıbesi bar. Franshızany satýdy bastamastan buryn biz mundaı dúkenderdiń túri qajet ári ol biregeı jáne bıznes júrgizýdiń bul úlgisi jumysqa qolaıly ekendigin is júzinde kórsetkimiz keledi», - deıdi RTS-MINISTOP kompanııasynyń Basqarma tóraıymy Baıan Qospenbetova. Onyń aıtýynsha, kompanııa alǵashqy ýaqyttarda dúkenderdiń operatsııalyq basqarýyn ózi júrgizetin bolady. 1 jyl ishinde respýblıka aýmaǵynda taǵy 15 kombo-stor ashý josparlanyp otyr. Al franshızanyń resmı satylymy 2013 jyldyń tamyzynda bastalady. Jobaǵa quıylyp otyrǵan qarjynyń jalpy kólemi shamamen 10 mıllıon dollardy quraıdy. Kompanııada qazir 25 adam turaqty negizde jumys jasaıdy, al 20 adam ishinara jumyspen qamtamasyz etilgen. Olarǵa Japonııadan kelgen onshaqty keńesshi kómek kórsetetin bolady.
«ACNielsen zertteý kompanııasynyń málimetteri boıynsha, 2011 jyldyń sońyna qaraı «úı janyndaǵy» dúkenderdiń mańyzdylyǵy 2010 jylmen salystyrǵanda kúsheıgen. Osyndaı dúkenderden tutynýshylardyń 90 paıyzǵa jýyǵy ózine qajetti zattardy satyp alady. Tutynýshy shamamen 30 kúnniń 22-inde úı janyndaǵy dúkenderge baryp turady. Alaıda úı janynda ornalasqan dúkender segmentine degen suranystyń bolýyna qaramastan, biryńǵaı toptyq standarttardy ustanatyn jáne qyzmet kórsetýi men sapasyn qadaǵalaýǵa bolatyn, sondaı-aq tutynýshylardyń qajettilikterine ǵylymı taldaý jasaý negizinde taýarlardyń jıyntyǵyn tańdap alatyn jeliler respýblıkada joq», - deıdi Baıan Qospenbetova. Aýdany 180 sharshy metrdi quraıtyn dúken ishinde saýda alańymen qosa dúkendi basqarýshynyń keńsesi, qoıma, fastfýdty daıyndaýǵa arnalǵan ashana jáne 20 orynǵa shaqtalǵan kafeterıı ornalasqan. Dúken qolma-qol aqshasyz tólem jasaýǵa múmkindik jasaıtyn kassa quralymen jabdyqtalǵan. Sondaı-aq, dúkende bankomat pen kommýnaldyq jáne basqa da tólemderdi jasaýǵa bolatyn termınal ornatylǵan. Munda múmkindigi shekteýli adamdarǵa qyzmet kórsetý úshin búkil jaǵdaı jasalǵan. Satylymda azyq-túlik taýarlary, úı sharýasyna qajetti taýarlar, jýrnal men gazetter sekildi kúndelikti suranysqa ıe taýarlar, sodaı-aq, japondyq óndiristen shyqqan taýarlardyń shaǵyn buryshy, jańa pisken nan men sút ónimderi, úıge alyp ketýge bolatyn daıyn taǵamdar, fastfýd máziriniń taǵamdary bar. Taǵamdardyń keıbir túrleri, máselen, japondyq karımandar men salyndysy bar toqashtar Qazaqstanda alǵashqy ret satylatyn bolady. Baǵa basqa dúkenderdiń deńgeıinde bolmaq.
