Almatyda «Classic» radıosynyń 3 jyldyǵyna arnalǵan merekelik kontsert ótedi
ASTANA. QazAqparat - 18 maýsymda, saǵat 19.00-de Almaty qalasyndaǵy Qurmanǵazy atyndaǵy Memlekettik konservatorııanyń Úlken kontsert zalynda «Qazaqstan» teleradıo korporatsııasynyń quramyndaǵy klassıkalyq mýzyka formatynda habar taratatyn «Classic» radıosynyń 3 jyldyǵyna arnalǵan úlken kontsert ótedi, dep habarlaıdy «Qazaqstan» TRK baspasóz qyzmeti.
«Classic» radıosy - klassıkalyq tolqyn» atty keshke Qazaqstannyń Memlekettik úrlemeli aspaptar orkestri, «Kamerata Kazahstana» memlekettik orkestri, «Magic of Nomads» etno-djaz toby, «Qazyna» ansambli men Qazaqstanda tuńǵysh ret tanymal mýzykant, Skandınavııanyń joǵary bıznes mektebiniń oqytýshysy Mıhaıl Kazınık qatysady. Sondaı-aq, keshte orkestrlik shyǵarmalar men premeralar usynylady.
15 maýsym kúni Qurmanǵazy atyndaǵy Memlekettik konservatorııanyń stýdentteri radıonyń 3 jyldyǵyna fleshmob uıymdastyryp ótkizdi. Jas mýzykanttar - baıanshylar, vıolonchelıster, urmaly jáne úrlemeli aspap sheberleri men aralas hor ókilderinen turatyn jas mýzykanttar toby qazirgi zamanǵa saı árlengen klassıkalyq shyǵarmalardy oryndady. Fleshmob Ortalyq mádenıet jáne demalys saıabaǵynda, Almaty áýejaıynda, Balýan Sholaq atyndaǵy sport saraıy aldynda, 28 panfılovshy-gvardııashy saıabaǵynda, tsırk ǵımaraty alańynda, "Arman" kınoortalyǵy aldynda, "Almaty-2" temirjol beketinde jáne Arbatta ótti.
Esterińizge sala keteıik, 2013 jyly Londonda Halyqaralyq teleradıotaratýshylar Assotsıatsııasy uıymdastyrǵan «AIBs Inspiring Creativity Awards» baıqaýynda «Classic» radıosynyń «Klassıkomanııa» baǵdarlamasy «eń biregeı, oıyn-saýyq jáne damytatyn baǵdarlama» dep tanylyp, arnaıy dıplommen marapattaldy.
2013 jyly Fashion TV Awards saltanatynda «Classic» radıosyna «Sánnen shyqpaıtyny úshin» júldesi tabys etildi.
«Classic» radıosy Almaty qalasynda 102.8 jıiliginde jáne Astana qalasynda 102.7 jıiliginde táýligine 24 saǵat boıy habar taratady.
