Almatyda tsırk jáne estrada ártisi Murat Mutyrǵanovtyń «Arenada 20 jyl» atty benefıs keshi ótedi
; ALMATY. Sáýirdiń 21-i. QazAqparat /Názıra Eleýhan/ - Almatydaǵy Qazaq Memlekettik tsırkinde sáýir aıynyń 24-i men mamyr aıynyń 9-y aralyǵynda Respýblıkaǵa eńbegi sińgen óner qaıratkeri, tsırk jáne estrada ártisi Murat Mutyrǵanovtyń «Arenada 20 jyl» atty benefıs keshi ótedi.
Bul týraly búgin atalmysh sharaǵa oraı ótkizilgen arnaıy baspasóz máslıhatynda aıtyldy, dep habarlaıdy QazAqparat.
«Tsırk - bul ǵajaıyp álem. Men alty jasymda eńbek kitapshamdy alyp, qyzmet jolymdy ákemmen birge solo-kloýnnan bastadym. Ákem kishkentaı kezinen ártis bolsam dep armandaıdy eken, meniń de balam tsırkte bolmasa da, óner jáne mádenıet salasynda jumys istese dep armandaımyn», dedi mereıtoı ıesi Murat Mutyrǵanov.
Benefıs baǵdarlamasynda «Mýtýrganchıkı-shoý» ujymy, Máskeý, Kıev jáne Mınsk Memlekettik tsırk ártisteri, «Tańsári» ujymy, «Ný, pogodı», «Ling Bro» bı toby, qazaqstan estrada juldyzdary - Aıgúl Imanbaeva jáne «Pertsy», «Arnaý», «Pıonerkı» toptary qatysyp, óner kórsetedi. Konferanse rólin osydan 20 jyl buryn alty jasar Murat Mutyrǵanovty arenaǵa jetektep shyqqan ánshi Erlan Kókeev atqarady.
Murat Mutyrǵanov 1990 jyly Veronede ótken tsırk óneriniń balalar festıvalinde álemniń eń jas kloýny atanǵan bolatyn. Onyń aty «DIVO» rekordtar kitabyna engizilgen. AQSh - ta kloýyndyq dańq murajaıynda «MURATIK» degen atpen plıta ashyldy, onyń nómiri 411.
