Almatyda tsırk ónerpazy 3 tonnalyq kólikti súıredi
ALMATY. QazAqparat - Almatyda Halyqaralyq tsırk kúnine oraı Qazaq memlekettik tsırkiniń ujymy qaıyrymdylyq qoıylymyn uıymdastyrdy.
Merekelik qoıylymdy múmkindigi shekteýli balalar, jetim jáne áleýmettik turǵydan az qamtylǵan otbasylardyń balalary tamashalady.
Kelýshiler nazaryna Ásel men Batyrjan Beısenovterdiń túıeleriniń «Sıqyrly kerýeni», Tımýr Qorjymbaevtyń úıretilgen ıtteri óner kórsetti.
Halyqaralyq baıqaýlardyń jeńimpazdary áýe akrobattary Qanafına Álııa men 11 jastaǵy Marııa Starodýbovanyń óneri kórermenderdi tańdandyrdy.
Sondaı-aq, machta akrobattary, áýe gımnastarynyń qoıylymy jurtshylyq kóńilinen shyqty.
Ásirese, kópshiliktiń kóńilin ónerpaz Jaıdarbek Kúnqojanovtyń jetekshiligindegi halyqaralyq baıqaýlardyń jeńimpazy, qazaq tsırkiniń maqtanyshy «Nomad» atty-akrobatıkalyq toby bir serpiltip tastady.
Ónerpaz qyz-jigitter shaýyp bara jatqan attyń baýyrynan ótip, at qulaǵynda oınady.
Dúıim jurttyń nazaryn «Stal» tobynyń kúsh-qaırat shoýy aýdardy.
Jigitter bileýdeı temirdi moınymen op-ońaı ıip, kóliktiń shınalaryn dopsha atty.
Eki ıyǵyna eki kisi mingendeı eki jigit salmaǵy 2 tonna bolatyn kólikti ornynan ońaı qozǵady. Aıta ketý kerek, kólikke kórermenderdiń arasynan 8 adam otyrdy.
