Almatyda tsıfrlyq tehnologııalardy damytý maqsatynda ІT keńes qurylady

ALMATY. QazAqparat – Búgin Almaty ákimi Baqytjan Saǵyntaev qalanyń ІT qaýymdastyǵymen kezdesti, dep habarlaıdy QazAqparat tilshisi. Kezdesý barysynda tsıfrlyq tehnologııany damytý máselesi talqylandy.

Tsıfrlyq kompanııalar, onlaın servıs, elektrondy kommertsııa ókilderi osy salanyń damýy týraly oılaryn ákimge jetkizdi.

Vıdeobaqylaý júıesin jasaýshy Qaırat Ahmetov «Alataý» arnaıy ekonomıkalyq aımaǵynda stýdenttik kampýs salýǵa usynys berdi.

Qarjylyq tehnolog Rýslan Omarov JOO stýdenttik zerthanalar salý jaıyn aıtty.

«Jaqynda QR Prezıdenti Qasym-Jomart Toqaev Almatyǵa sapary barysynda qalanyń barlyq salasyn tsıfrlandyrýdy tezdetýdi tapsyrǵan bolatyn. Biz úshin sizderdiń kómekterińiz mańyzdy. Qurylatyn ІT keńes aıasynda kezdesip, mańyzdy máselelerge sheshim izdeıtin bolamyz», - dedi ákim.

Baqytjan Saǵyntaevtyń aıtýynsha, qala basshylyǵy múddeli taraptardyń qyzmetin úılestirip, ınfraqurylym qalyptastyrýda kómek kórsetetin bolady.

«Almatyda ІT-salasynyń basty resýrsy — baı adamı kapıtal bar. Programmısterdiń mektebin ashý jónindegi bastamany qoldaımyz. Jalpy ınfraqurylymdy damytýǵa kómektesip, barlyq múddeli taraptardy tartyp, ǵylymı ınstıtýttar men joo-nyń áleýetin paıdalanamyz.

Bizdiń qalamyz osy saladaǵy álemniń barynsha ınnovatsııaly, ilgeri damyǵan qalasy bolady jáne bolýy tıis. Bul saýda basymdylyǵy bar ekonomıkanyń qurylymyn ózgertip, megapolıs ómirinde ІT-qoǵamdastyǵynyń úlesin keńeıtedi», - dedi ákim.