Almatyda Chýntsın qalasynyń fotokórmesi ashyldy

«Bir beldeý, bir jol» bastamasy aıasynda Chýntsın týraly qala basshylyǵy Qytaı-Eýropa temirjol baǵytyndaǵy qalalarǵa aqparattyq nasıhat júrgizip keledi. Ondaǵy maqsat - mádenı jáne saýda-ekonomıkalyq qatynastardy tereńdete túsý. Ásirese Qazaqstan bul aımaqqa jaqyn ornalasqan.

Bul Almatydaǵy Chýntsın qalasy Halyq úkimetiniń uıymdastyrýymen ótkizilip jatqan ekinshi fotokórme. QHR Almatydaǵy Bas konsýlynyń orynbasary Mıao Hýnbo mádenı sharaǵa qatysty pikirin bildirdi.

«Bas konsýldyq atynan kezekti kórmeni tanystyrǵym keledi. Bıyl «Bir jol, bir beldeý» bastamasyna da 5 jol tolady. Osy jyldar ishinde 100-den astam memleket pen halyqaralyq uıymdar bul bastamaǵa qoldaý kórsetti. Sonyń ishinde Chýntsın men Almaty óte tyǵyz baılanysta. Chýntsınde 500-den astam qazaqstandyq stýdent bilim alady. Ońtústik- batys ýnıversıteti men Abylaı han atyndaǵy Qazaq halyqaralyq tilder ýnıversıteti birlese jumys isteýde. Eki qalanyń ózara seriktestigi odan ári nyǵaıa túserine senemin»,-dedi ol.
 

Shara aıasynda QR Ulttyq kitaphanasy, Abylaı han atyndaǵy Halyqaralyq Qatynastar jáne Álem Tilderi Ýnıversıteti men Chýntsın qalasy ókilderi yntymaqtastyq memorandýmyna qol qoıdy.
 

«Kitaphana tek ádebıetti ǵana emes basqa elderdiń mádenıetin tanystyratyn ortalyq. Ulttyq kitaphanada 8 eldiń mádenı jáne ádebıet ortalyǵy bar. Sonyń ishinde Qytaı ortalyǵynyń ashylǵanyna 1 jarym jyl boldy. Chýntsın qalasynyń basshylyǵy úlken delegatsııany bastap kelip otyr»,-dedi QR Ulttyq kitaphana dırektory Janat Seıdýmanov.

Chýntsın halqy 32 mıllıonnan asatyn Qytaıdyń iri ortalyq qalasy. Megapolıstyń 3000 jyldyq tarıhy bar. Qalanyń mádenı jáne tarıhı eskertkishteri men ondaǵy áıgili murajaılardy, sáýlet ónerin jáne erekshe tabıǵatynyń kelbetin fotokórmeden tamashalaýǵa bolady.

Qytaıdyń mádenıet kúnderi aıasynda almatylyqtar nazaryna bes kún boıy Chýntsınniń baı ári sanalýan kórinisi usynylady.