Almatyda «Chernobyl AES-degi ıadrolyq apatqa 25 jyl» degen taqyrypta halyqaralyq dóńgelek ústel ótti
ALMATY. 12 sáýir. QazAqparat /Erlik Erjanuly/ - Chernobyl AES-degi ıadrolyq apattyń zardabyn joıýǵa qatysýshylarǵa Qazaqstanda áli kúnge deıin birde-bir eskertkish ornatylǵan joq. Bul týraly búgin Almatyda ótken «Chernobyl AES-degi ıadrolyq apatqa 25 jyl» dep atalatyn halyqaralyq dóńgelek ústel jıynynda aıtty.
«Almatyda birneshe jyl buryn Chernobyl AES-degi apatty joıýshylarǵa eskertkish qoıylatyn jerge quzyrly oryndardyń ruqsaty alyndy. Sondaı-aq ol eskertkishtiń birneshe úlgisi jasaldy. Alaıda ony salýǵa qajetti 70 myń AQSh dollary kólemindegi qarjyny ardagerler óz kúshimen taba almaı otyr», - deıdi Chernobyl jáne lokaldy soǵys ardagerleri odaǵynyń prezıdenti Rahym Ábdákirimov.
Onyń aıtýynsha, 1986 jyly 26 sáýirde Ýkraınadaǵy Chernobyl AES-degi ıadrolyq apattyń zardabyn joıýǵa burynǵy Keńes repýblıkalarynan 600 myńǵa jýyq adam qatysqan. Olardyń 31 743-i qazaqstandyqtar. Qatary kún sanap kemip kele jatqan olardyń sany qazirgi kezde 4519 adam.
«Jastarǵa patrıottyq tálim-tárbıe berýde aǵa býynnyń bul erligin umytýǵa bolmaıdy. Olarǵa kórsetiletin qurmet kózi tirisinde jasalýy kerek. Sondyqtan tarıhtyń umytylmas bir kezeńiniń belgisi retinde chernobyldik ardagerlerge eskertkish qoıý memlekettiń bir paryzy bolýy tıis», - degen Rahym qajynyń sózine barlyq ardagerler qoldaý kórsetip otyr. Olardyń paıymdaýynsha, bul eskertkish onsyz da árbir kúni sanaýly chernobyldikterge ǵana emes, olardyń artynda qalatyn jas urpaq úshin qajet. Qazir úkimet oryndary olardy bul sharaǵa bıýdjette qarjy qarastyrylmaǵan, sizder demeýshilerdi ózderińiz tabýlaryńyz kerek degendi aıtýda. Al kásipkerler qarjynyń belgili bir bóligin ǵana bere alatyndaryn aıtyp, qalǵan qarajatty úkimettik organdar óz moınyna alýy kerek degen usynys jasap otyr.
