Almatyda tserebraldy sal aýrýyna shaldyqqan balalardy emdeý qalaı júrip jatyr
ALMATY. QazAqparat - Elimizde 98,2 myńnan astam múgedek bala bar. Onyń 19 myńnan astamyna tserebraldy sal aýrýy dıagnozy qoıylǵan. Búginde medıtsına bul dertti tolyq emdep jazýǵa qaýqarsyz.
Ortalyq júıke júıesindegi aqaýdy sapaly reabılıtatsııa men balanyń óz betinshe júrip-turý qabiletin damytý arqyly retteýge bolady. Bul týraly «Áleýmetttik medıtsınalyq saqtandyrý qory» KEAQ Almaty qalalyq fılıaly málim etti, dep habarlaıdy QazAqparat tilshisi
«Áleýmetttik medıtsınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaevtyń aıtýynsha, 2020 jyldan bastap ońaltý jáne densaýlyqty qalpyna keltirýge baǵyttalǵan em-sharalar mindetti áleýmettik medıtsınalyq saqtandyrý arqyly qarjylandyrylady.
«Qazaqstanda 18 jasqa deıingi balalar medıtsınalyq kómekti tegin paıdalanady jáne memleket tarapynan saqtandyrylady. Mysaly, osy jyldyń 4 aıynda ońtústik astanada balalarǵa 4,5 myńnan astam reabılıtatsııalyq em-shara júrgizildi. Oǵan Qor tarapynan 915,7 mln teńgege jýyq qarjy tólendi. Al, 2023 jyl sońyna deıin Qor taǵy da osyndaı 15 myń em-sharaǵa 3,2 mlrd teńge tólemek», – dedi MSQ Almaty fılıaly dırektory Tileýhan Ábildaev.
Qarjy kólemi artqan soń reabılıtatsııa profıli boıynsha mamandandyrylǵan qyzmet kórsetetin klınıkalar men ortalyqtar da kóbeıdi.
Solardyń arasynda «ARDI» múgedek balalar ata-analary qaýymdastyǵy» da bar. Ortalyq tserebraldy sal aýrýyna shaldyqqan balalardy, sondaı-aq júıke júıesi zaqymdanǵan kishkentaı patsıentterdi ońaltýdyń 3-shi kezeńi boıynsha qabyldaıdy.
Ótken jyly ARDI ortalyǵynda 800-den astam bala MÁMS arqyly medıtsınalyq ońaltýdan ótken. Emdelip, aıaqqa turǵan balalardyń ishinde 25-i jalpy bilim beretin mektepter men balabaqshaǵa barǵan.
«Bizdiń ortalyq mamandary erekshe balalardy fızıkalyq reabılıtatsııadan ótkizip qana qoımaı, psıhologııalyq-pedagogıkalyq turǵydan damytýdy maqsat etedi. Mýltıdıstsıplınarlyq komanda quramynda nevrolog, pedıatr, reabılıtolog, psıhoterapevt, emdik dene shynyqtyrý mamany, massajıst, ortoped, psıholog, ergoterapevt, defektolog, logoped, áleýmettik qyzmetker syndy mamandar eńbek etedi. Osyndaı mamandardyń jan-jaqty kómegimen balalarǵa da, ata-analarǵa da kómek kórsetýge tyrysamyz», – deıdi ortalyqtyń bas dárigeri Aısulý Qojanova.
Ortalyqta ergoterapııa bólimshesi, Montessorı kabıneti, qarańǵy jáne jaryq sensorlyq bólme bar. Kınezıoterapııa jáne mehanoterapııa zaldary balanyń júrip-turý, qasyq, qalam syndy usaq zattardy ustaý daǵdysyn qalyptastyrýǵa arnalǵan zamanaýı qondyrǵylarmen jabdyqtalǵan.
«Bizdiń mamandar ortalyqqa emdelýge kelgen balaǵa basymdyq beredi. Eń aldymen, qımyl-qozǵalys apparaty tıisinshe damymaǵan balaǵa den qoıamyz. Mamandar komandasy naýqasty keshendi damytý protsesin bastaıdy. Mindetti túrde onyń otbasymen jumys isteımiz. Oqytamyz, úıde balany damytýǵa qajetti jaǵdaı jasaý joldaryn úıretemiz. Sonymen qatar, onyń qorshaǵan ortasyna kóńil bólemiz, sebebi bul balaǵa, onyń ómir sapasyna áser etpeı qoımaıtyn faktorlardyń biri», – deıdi ortalyq qyzmetkerleri.
ARDI qaýymdastyǵy bazasynda arnaıy oqý-resýrstyq ortalyǵy jumys isteıdi. Onda sheteldiń bilikti mamandary erekshe balalardy ońaltý taqyrybynda semınarlar men trenıngter ótkizip turady.
Esterińizge sala ketsek, ortalyq áleýmettik baǵdar ustanady jáne balalardy MÁMS pen qala ákimdiginiń áleýmettik qorǵaý baǵdarlamalary negizinde emdeıdi.
Aıta keteıik, «ARDI» múgedek balalar ata-analary qaýymdastyǵy 1991 jyly bir top bastamashyl ata-analar tarapynan qurylǵan. Sodan beri qaýymdastyq múmkindigi shekteýli perzent tárbıelep otyrǵan 745 otbasyna turaqty qoldaý kórsetip keledi. 2004 jyly derbes ońaltý ortalyǵy bolyp qurylǵan qaýymdastyq 19 jyldan beri tserebraldy sal aýrýymen aýyratyn balalardy keshendi reabılıtatsııadan ótkizýde.
