Almatyda «Tselınnyı» kınoteatryn rekonstrýktsııalaý jumysy bastaldy
ALMATY. QazAqparat - Almatyda «Tselınnyı» kınoteatryn qaıta qurý jumysy bastaldy, dep habarlaıdy QazAqparat tilshisi.
«Tselınnyı» zamanaýı mádenıet ortalyǵynyń dırektory Djama Nurqalıevanyń aıtýynsha, ǵımarat buzylmaıdy.
«Ǵımaratty eshkim buzbaıdy. 2018 jyldan beri kóp aıtylǵan «Tselınnyıdy» qaıta qurý jumysyn bıyl bastadyq. Bul ýaqyt ishinde biz QazQSǴZI-men birge jobalyq jumystar, tehnıkalyq zertteýler júrgizdik, jobamyzdy qoǵamdyq keńeske usyndyq, jobamyz taǵy pysyqtalyp, belgilengen zańnamalyq rásimderge sáıkes qaıta kelisýden ótti», – dedi ol.
Qazirgi ýaqytta ǵımarattyń 2000 jyldardyń basynda jasalǵan jáne qurylysty qatty búldirgen jóndeý elementteri bólshektelip jatyr.
«Ǵımarattyń burynǵy qalpyn saqtaý múmkin emes. Sebebi, ol adamdarǵa qaýipti. Qaıta qurý barysynda ǵımarattyń jalpy formasy, tirek qurylymdary, irgetasy men Evgenıı Sıdorkınniń biregeı pannosyn saqtaımyz. Kınoteatr aǵa býyn almatylyqtar úshin tanymal bolyp qala beredi, sonymen birge, bul rette zamanaýı jáne tehnologııalyq bolady», – dedi Djama Nurqalıeva.
Kınoteatrdy qaıta qurý jumysyna jergilikti jáne sheteldik kóptegen mamandar tartylǵan. Atalǵan jumys aıasynda qorshaǵan ortany da tolyǵymen abattandyrý kózdelip otyr.
Eske salsaq, «Tselınnyı» kınoteatry 1964 jyly salynyp, 2014 jylǵa deıin jumys istedi.
