Almatyda tseh jumysshysynyń qoly et tartqyshqa kirip ketti
ALMATY. QazAqparat – Almatyda et tsehynda jumys isteıtin er adamnyń qoly tartqyshqa kirip ketti, dep habarlaıdy QazAqparat tilshisi.
Almatyda kotlet jasaıtyn et tsehynda jumys isteıtin 1981 jylǵy er adam tartqyshqa et salǵan kezde, qoly da qurylǵyǵa kirip ketken. Er adam eshteńe isteı almaı qalǵan, sebebi qurylǵy úzdiksiz jumys isteıdi.
«Respýblıkalyq jedel-qutqarý jasaǵy» MM málimetinshe, 26 qańtarda kezekshi bólimge osy jaǵdaı týraly habarlama túsedi.
«Quramynda 7 qutqarýshy bar jedel top dereý jolǵa shyqty. Jetken sátte qutqarýshylar er adamnyń qolyn et tartqyshtan shyǵarýǵa kiristi. Tehnıkalyq jumystarmen birge, RJQJ psıholog-qutqarýshysy psıhologııalyq kómek kórsetti. Qutqarý operatsııasy aıaqtalǵan soń, zardap shekken er adam jedel járdem qyzmetine jiberildi», - dep habarlady mekemeden.
«Respýblıkalyq jedel-qutqarý jasaǵynyń» qyzmetkerleri azamattardy kez kelgen jumysta qaýipsizdik tehnıkasyn saqtaýǵa shaqyrdy.
