Almatyda BZJQ paıdasyna 3 mlrd teńgeden astam zeınetaqy aktıvi qaıtaryldy

ALMATY. QazAqparat - Almaty qalasy prokýratýrasynyń azamattyq, ákimshilik ister jáne atqarýshylyq is júrgizý boıynsha sot aktileriniń zańdylyǵyn qadaǵalaý basqarmasy «HOMEBROKER» AQ-dan «BJZQ» AQ paıdasyna 3 161 428 049 teńge mólsherinde zeınetaqy aktıvterin óndirip alý sharasyn qabyldady, dep habarlaıdy QazAqparat tilshisi.

Prokýratýranyń málimetinshe, atqarýshylyq is júrgizý materıaldaryn zerdeleý kezinde «HOMEBROKER» AQ – nyń boryshkerdiń bankrottyǵy jolymen «BJZQ» AQ aldyndaǵy mindettemelerin oryndaýdan jaltarý, keıin osy mindettemelerdi esepten shyǵarý jáne debıtor-affılıırlengen kompanııalardan boryshty óndirip alý jóninde pármendi sharalar qoldanbaý faktileri anyqtaldy.

«Qala prokýratýrasynyń tapsyrmasy boıynsha «BJZQ» AQ-ǵa «Sıtı Servıs Invest Stroı» JShS-dan atalǵan qarajatty óndirip alý jolymen «HOMEBROKER» AQ-dan bereshek somasyn sot tártibimen óndirip alý jumysy júrgizildi. Nátıjesinde «HOMEBROKER» AQ-nyń «BJZQ» AQ aldyndaǵy bereshegi tolyq kólemde óteldi»,- dep habarlady Almaty qalalyq prokýratýrada.