Almatyda «Bıýdjetke qatysý» jobasyna turǵyndardan usynys 2 ese kóp tústi
ALMATY. QazAqparat - Óńirlik kommýnıkatsııalar qyzmetiniń alańynda ótken onlaın-brıfıng barysynda Almaty qalasynyń Strategııa jáne bıýdjet basqarmasy basshysynyń orynbasary Janar Jazyltaeva «Bıýdjetke qatysý» baǵdarlamasynyń bastalýy týraly aıtty, dep habarlaıdy QazAqparat tilshisi.
«Bıýdjetke qatysý» jobasy boıynsha budget.open-almaty.kz. saıtynda ótinish qabyldaý 2020 jyldyń qazanynda aıaqtaldy.
«Bıyl qala turǵyndarynan jalpy somasy 23,7 mlrd teńge bolatyn 796 joba túsken. Qorytyndysynda quny 10,7 mlrd teńgeni quraıtyn 448 bastama daýys berýge jiberildi. Jobalardyń bireýin avtory qaıtaryp aldy, saıtta barlyǵy 795 joba bar. Byltyr 333 jobalyq usynys túsken. Biz eki esege deıin óskenin kórip otyrmyz», - dedi Janar Jazyltaeva.
Spıkerdiń aıtýynsha, ótinishterdiń kóbi abattandyrýǵa baılanysty.
Atap aıtqanda, trotýarlardy, pandýstardy, aryqtardy jaıaý júrginshiler aımaǵyn, kúrkelerdi jóndeý, jalpyǵa ortaq oryndarda balalar jáne oıyn, sport alańdaryn ornatyp, jaryqtandyrý, oryndyqtar men qoqys salǵyshtardy ornatý boıynsha usynystar engizildi.
281 jobaǵa ruqsat berilmedi. Sebebi, olardyń birazy jobalyq usynys sanattaryna sáıkes kelmedi, jalpy qoldanystaǵy nysan emes, jobalyq usynystardy júzege asyrý aýdan ákimi apparattarynyń quzyrettiliginen tys bolyp shyqqan. Bolmasa jumystar 2021-2022 jyldarǵa josparlanǵan. Keıbireýinde ýchaske jeke menshik, turǵyn úı kesheniniń, baý-baqsha seriktestigi aýmaǵynda ornalasqan bolyp shyqty.
Keıbir tulǵalar jeke kommertsııalyq sıpattaǵy usynys aıtqan.
«Aıaqtalmaǵan 60 jobalyq usynystarǵa qatysty aıtar bolsaq, avtorlary naqtylap, qaıtadan óz usynystaryn engizýi úshin túzetýge jiberildi. Soǵan qaramastan, turǵyndardan jobalyq qujattamasyn jasap, bolmasa, qandaı da bir esep júrgizý talap etilmeıdi», - dep túsindirdi J.Jazyltaeva.
Ol úshin sarapshy komıssııa negizindegi tıisti mamandar kómek kórsetedi.
