Almatyda «Bıýdjetke qatysý» jobasy boıynsha ótinim qabyldaý bastalady

ALMATY. QazAqparat– Almatyda «Bıýdjetke qatysý» jobasy boıynsha ótinim qabyldaý bastalady. Ótinimderdi jınaý 5 qazanǵa deıin jalǵasady, dep habarlaıdy QazAqparat tilshisi.

«Kez-kelgen adam qalalyq ortany damytýǵa qatysty óz ıdeıasyn usyna alady. Eger daýys berý kezinde bastama basqa turǵyndar tarapynan qoldaý tapsa, ol qalalyq bıýdjet esebinen júzege asyrylady. Bir ótinim 55,5 mln teńgeden aspaýy tıis. Qarjylandyrýdyń jalpy kólemi 6,4 mlrd teńge, ıaǵnı ár aýdanǵa 800 mln teńgeden bolmaq», – dep habarlady Almaty ákimi Baqytjan Saǵyntaev Instagram paraqshasy arqyly.

Ótinimderdi qabyldaý, daýys berý jáne bastamalardy irikteý budget.open-almaty.kz portalynda onlaın túrde ótedi.