Almatyda byltyr otyrǵyzylǵan taldardyń 16 paıyzy qýrap ketken
ALMATY. QazAqparat - Almatyda 2020 jyly otyrǵyzylǵan 44 myń túp tal qýrap qaldy. Bul týraly qalalyq jasyl ekonomıka basqarmasynyń bastyǵy Natalıa Lıvınskaıa onlaın brıfıng barysynda aıtty, dep habarlaıdy QazAqparat tilshisi.
Spıkerdiń sózinshe, kóktemde 64 myń kóshet otyrǵyzyldy, kúzde taǵy 300 myń túp otyrǵyzý josparda. Byltyr otyrǵyzylǵan 282 myń kóshettiń 16 paıyzy jersinbegen.
«Ras 44 myń aǵash tamyr jaıǵan joq. Qýrap ketti. Standarttar boıynsha aǵashtardy jappaı otyrǵyzý kezinde 15 paıyzy jersinbeıdi. Sondyqtan bizde tek bir paıyz ǵana artyq. Biz 2019 jyldan beri otyrǵyzǵan barlyq kóshetterdi júıeli túrde baqylap otyramyz. Keıbir túrleri boynsha qıyndyqtar bar. Mysaly, Alataý aýdanyndaǵy qaraǵaı toǵaıy. Qaraǵaı men shyrshalardyń ashyq kún astynda tamyr jaıyp ketýi óte qıyn. Negizi, olar taý bókterinde ósetin aǵashtar. Qazir biz olardy emdep jatyrmyz», - dedi Natalıa Lıvınskaıa.
Sonymen qatar, ol bıyl tamyr jaıýy tómen ári aýrýǵa beıim aǵashtar otyrǵyzylmaıtynyn jetkizdi.
«Biz aǵash kútimine, jasyl qordy saýyqtyrýǵa jáne bıoártúrlilikti saqtaýǵa kóshtik. Almatynyń jasyl jelekterin sýlandyrý úshin jańa skvajınalar salyndy, sýarmaly aryq torabyna ınventarızatsııa júrgizildi, sýarý jumystary kúsheıtildi», - dedi Jasyl ekonomıka basqarmasynyń basshysy.
Natalıa Lıvınskaıa qalada otyrǵyzylǵan ósimdikterdiń aýqymy klımat pen topyraq quramyna baılanysty ǵylymı qaýymdastyqpen, landshaft mamandarymen birge irikteletinin basa aıtty.
«Bul rette jasyl jelekterdiń tizilimi qalyptasty, onda ár taldyń elektrondy pasporty bar. Reestr jasyl qordyń sapalyq jáne sandyq jaǵdaıynyń esebin júrgizýge múmkindik beredi. Júıe sonymen qatar otyrǵyzý alańdaryn, onyń ishinde ótemaqyny baqylaýǵa múmkindik beredi. Júıe barlyǵyna 2021 jyldyń qyrkúıeginen bastap basshylyqtyń resmı saıtynda qoljetimdi bolady»,-dedi basqarma basshysy.
Sonymen qatar, aǵashtardy saýyqtandyrý men emdeý jumystary, zınıakester men zeńge qarsy tórt ret bıologııalyq óńdeý qatar júrgizilýde.
