Almatyda byltyr aýyr qylmys kórsetkishi 15,9 paıyzǵa tómendep, uıymdasqan qylmystyq toptyń 48 múshesi ustalǵan
ASTANA. 4 aqpan. QazAqparat - Byltyr Almaty qalasynda aýyr qylmys jasaý 15,9 paıyzǵa qysqaryp, uıymdasqan qylmystyq toptyń 48 múshesi jaýapqa tartyldy.
Bul týraly Almaty qalalyq ákimdiginde quqyq qorǵaý organdarynyń ótken jyly atqarǵan jumystaryn qorytyndylaý jıynynda málim bolǵan.
Ákimdiktiń baspasóz qyzmetiniń habarlaýynsha, ishki ister departamentiniń jumysynda birqatar problemalar áli de barshylyq. Atap aıtqanda, oryn alǵan qylmystardy tirkeý barysynda 200 qylmys jasyrylǵan. Qalanyń kópshilik oryndarynda da qylmys jasaý artqan. Negizinen, qaladaǵy qylmysty syrttan kelgender jasaıtyny belgili bolyp otyr.
«Qala basshysy Ahmetjan Esimov óz sózinde elimizdiń eń iri qalasynda qylmystyń aldyn alý asa mańyzdy ekendigin aıtty. Ekonomıkanyń ósýi qylmystyń aldyn alýǵa jasalatyn sharalardy júzege asyrýǵa múmkindik beredi. Sońǵy úsh jyl ishinde ІІD qarjylandyrý 35 mlrd. teńgeden asty. Bıylǵa bólingen qarajat 11 mlrd. teńgeni quraıdy, bul jergilikti bıýdjettiń 70 paıyzyna teń», - delingen baspasóz habarlamasynda.
