Almatyda buzylǵan joldar úshin merdigerler jaýapqa tartylyp jatyr
ALMATY. QazAqparat - Almaty ákimi Baqytjan Saǵyntaevtyń tapsyrmasy boıynsha ınjenerlik jelilerdi salýdy júzege asyratyn kompanııalar jumys tehnologııasyn buzǵany úshin jaýapqa tartylady, dep habarlaıdy QazAqparat tilshisi.
Qalalyq ákimdik taratqan málimetke sáıkes, mamandandyrylǵan aýdanaralyq ákimshilik sotynyń sheshimimen «Monolıt Dızaın-2030» kompanııasy lıtsenzııadan aıyryldy jáne 800 AEK kóleminde aıyppul tóleýge mindetteldi. Bul kompanııa «Tastybulaq» yqshamaýdanynda ortalyq kommýnıkatsııalar qurylysyn júrgizgen bolatyn.
Byltyr atalǵan kompanııa jumysta jibergen kemshilikteri úshin ákimshilik sharaǵa tartyldy. Bıylǵy jyldyń aqpan aıynda «Tastybulaq» yqshamaýdanynyń turǵyndary Almaty ákimine kompanııanyń jumysty aıaqtaǵan soń joldardy retke keltirýdi sapasyz júrgizgeni týraly shaǵymdanǵan edi.
Osy shaǵymnyń negizinde qaıta tekserý júrgizildi, onyń qorytyndysy boıynsha birqatar kemshilikter anyqtaldy, materıaldar kompanııany lıtsenzııadan aıyrý úshin ákimshilik sotqa jiberildi.
Buryndary, Alataý aýdanynda ınjenerlik jelilerdi salýda birqatar zańbuzýshylyqtarǵa jol bergen «Sıgma» kompanııasy da sot sheshimimen lıtsenzııasynan aıyrylǵan edi.
Sonymen qatar, problemalyq nysandardy júrgizgen birqatar kompanııalardyń jumystary da qaıta tekseriletin bolady, olardyń arasynda Tóle bı kóshesindei ınjenerlik jelilerdi rekonstrýktsııalaǵan «AGS-PLAST» JShS men «Suńqar» JShS bar.
Eske salsaq, jaqynda Tóle bı-Muratbaev kósheleriniń qıylysynda «AGS-PLAST» JShS-niń ınjenerlik jumystardy sapasyz júrgizgendigi saldarynan jol qaq aırylǵan edi.
«Qazir búkil qala boıynsha qurylys jumystaryn júrgizý barysynda standarttardyń saqtalýyna baqylaý kúsheıtildi. Basqarma kásibı kompanııalardy jumysty oryndaý kezinde barlyq normalar men talaptardy saqtaýǵa shaqyrady. Tekserýler qorytyndylary boıynsha barlyq tıisti sharalar qoldanylady, tipti lıtsenzııalarynan aıyrýǵa deıin»,- delingen habarlamada.
