Almatyda buzaqylyqpen jasalǵan kisi ólimi ashyldy

Esterińizge sala ketsek, maýsym aıynyń ortasynda Almaty qalasynyń «Dorojnık» yqshamaýdanynyń turǵyn úıler aýlasynda ańshylyq myltyqtan atylǵan oqtan 26 jasar azamat qaza tapqan bolatyn.

«Turǵyn úı aýlasynda ýaqyt ótkizip otyrǵan dostarǵa sol mańnan ótip bara jatqan beıtanys adam kelip, kóńildi toptyń áńgimesine kılige ketedi. Eki jaq arasynda daý týyndap, nátıjesinde beıtanys azamat máseleni qarýmen sheshpek nıette jaqyn mańdaǵy úıinen ańshylyq myltyǵyn ákelip, aýla turǵynyn jaıratyp salady. 26 jasar azamat ishine tıgen oqtan 4-qalalyq aýrýhanada jarty saǵattan keıin kóz jumdy. Jedel izdestirý toby kúdiktiniń jeke basyn anyqtaý men ony izdestirýge baǵyttalǵan birqatar jedel-izdestirý is-sharalaryn júzege asyrǵan bolatyn», - dedi Almaty qalasy ІІD Krımınaldyq polıtsııa basqarmasy, jeke tulǵalarǵa baǵyttalǵan qylmystardy ashý bóliminiń bastyǵy Sabyrjan Jorabekov.

Jedel ýákilder nazaryna ilikken 21 jastaǵy kúdikti osy yqshamaýdanda týysqan ápkesiniń úıinde turyp kelgen. Alaıda qylmys jasaǵannan keıin ol iz jasyryp júrgen. Kúdiktiniń týystyq qatynastaryn teksergen jedel ýákilder onyń Almaty oblysynyń Boraldaı eldi mekeninde jasyrynyp jatýy múmkin degen toqtamǵa keledi. Alaıda bul tuspal joqqa shyǵyp, qandyqol qylmysker óziniń týǵan jerine ketip qalǵandyǵy belgili bolǵan.

«Ońtústik Qazaqstan oblysynyń týmasy Almatyǵa úsh jyl buryn jumys isteýge kelgen. Qala bazarlarynyń birinde júk tıeýshi bolyp jumys atqaryp júrgen. Al oq atylǵan ańshylyq qarýǵa onyń eshqandaı ruqsat qaǵazy bolmaǵandyqtan, qarý esh jerde tirkelmegen. Qylmysker qolǵa túskennen keıin ańshylyq myltyq ta tárkilenip, qylmystyq iske aıǵaq zat retinde tirkelgen soń, ballıstıkalyq saraptamaǵa jiberildi. Saraptama nátıjesinen keıin bul tirkelmegen qarýdyń basqa da ashylmaǵan qylmystarǵa qatysy bar-joǵy anyqtalatyn bolady», - dedi S.Jorabekov.

Al Krımınaldyq polıtsııa basqarmasy qylmyskerdiń qylmysyn tolyǵymen áshkereleıtin dálelder negizi tolyq ekendigin alǵa tartty. Qylmysker bolsa óz kinásin tolyǵymen moıyndap otyr. Aldaǵy ýaqytta oǵan beriletin jazany sot oryndary taǵaıyndaıtyn bolady.