Almatyda BUU-nyń elimizdegi alǵashqy ókildiginiń 25 jyldyǵy atalyp ótti

ALMATY. QazAqparat - Almatyda Qazaqstandaǵy Birikken Ulttar Uıymynyń alǵashqy ókildigi ashylýynyń 25 jyldyǵy atalyp ótti, dep habarlaıdy QazAqparat tilshisi.

Almatyda «Qazaqstan-BUU: tájirıbe, jetistikter men yntymaqtastyqtyń keleshegi» atty joǵary deńgeıdegi arnaıy keńes aıasynda megapolıs ákimi Baýyrjan Baıbek pen QR Syrtqy ister mınıstri Qaırat Ábdirahmanov Qazaqstan Respýblıkasyndaǵy BUU-nyń 25 jyldyq qyzmetine arnalǵan estelik taqtany saltanatty túrde ashty.

QR Syrtqy ister mınıstri Birikken Ulttar Uıymyna qosylǵan kezden bastap, Qazaqstan onyń belsendi múshesi ári senimdi serigi bolǵanyn atap ótti.

«BUU uıymdary men baǵdarlamalary Qazaqstannyń áleýmettik-ekonomıkalyq damýyna eleýli úles qosyp otyr. BUU elimizge burynǵy Semeı ıadrolyq polıgonyn saýyqtyrý, Aral teńizin qalpyna keltirý sekildi mańyzdy jobalar aıasynda tehnıkalyq jáne qarjylyq kómek kórsetti», - dedi Q. Ábdirahmanov.

Qala ákimi Baýyrjan Baıbek megapolıste BUU-nyń damý baǵdarlamasymen birge «Turaqty kólik» jobasy iske asyp jatqanyna toqtaldy.

«Búgingi kúni Almatyda elimizdiń birikken kásiporyndarynyń 40% jumys isteıdi jáne halyqaralyq uıymdarmen transulttyq kompanııalardyń 60-tan astam ofısi ashylǵan. Uıymnyń Qazaqstandaǵy qyzmetiniń 25 jyldyǵy barysynda óńirlik habty kúzde ashý josparlanyp otyr. Bul - Qazaqstanmen seriktestiktiń jańa tarıhı jeńisi bolady», - dedi B.Baıbek.

Almaty ákimi byltyr Almatynyń 1000 jyldyǵy ıÝNESKO-nyń aıtýly oqıǵalar kúntizbesine engenin de tilge tıek etti.

Sóz kezegin alǵan BUU-nyń Orta Azııa boıynsha Bas hatshysynyń arnaıy ókili Natalıa German Qazaqstannyń mańyzdy jetistikterine toqtaldy. 

«Qazaqstan BUU-men yntymaqtastyqta joǵary deńgeıge qoljetkizdi. Prezıdent Nursultan Nazarbaevtyń antıterrorlyq koalıtsııa qurý bastamasy álem úshin óte mańyzdy, óıtkeni munda terrorızmge oryn joq. Qazaqstannyń qarýsyzdaný jáne ıadrolyqqarýdy taratpaý jónindegi álemdegi róli óte joǵary. Men beıbitshilikti qalaıtyn barlyq qazaqstandyqtarǵa alǵys aıtamyn», - dedi Natalıa German.

Aıtýly sharaǵa BUU janyndaǵy QR alǵashqy turaqty ókili, burynǵy QR Syrtqy ister mınıstri Aqmaral Arystanbekova, QR BUU-nyń úılestirýshi-rezıdenti Norımasa Shımomýra qatysty.