Almatyda burynǵy jemis kombınaty aýmaǵyndaǵy qurylys jobasy ózgeredi
ALMATY. QazAqparat - Almaty qalasynyń ákimi Baqytjan Saǵyntaevtyń tapsyrmasyna sáıkes qalalyq josparlaý jáne ýrbanıstıka basqarmasy burynǵy «Jemis konservi kombınaty» aýmaǵynda «Rams Kazakhstan» qurylys kompanııasymen jumys júrgizdi. Nátıjesinde, kompanııa usynǵan qurylys jobasyn ózgertýge mindetteldi, dep habarlaıdy QazAqparat tilshisi.
Qalalyq josparlaý jáne ýrbanıstıka basqarmasynyń málimetinshe, jobany qaıta qaraý kezinde Almaty qalasy ákimdiginiń jáne qoǵam ókilderiniń usynystary eskeriledi. Sonymen, qurylys salýshy jobada áleýmettik nysandardyń, onyń ishinde bilim berý mekemeleri men mektepke deıingi bilim berý mekemeleriniń bolýyn qamtamasyz etýge mindetti. Sonymen qatar, mamandardyń usynystaryna sáıkes ǵımarattardaǵy qabat sany ózgertiledi. Bul rette abattyndyrý men kógaldandyrýmen demalys aımaqtaryn qurýǵa erekshe nazar aýdarylatyn bolady.
Burynǵy kombınat aýmaǵyndaǵy qurylys jobasynyń áleýmettik mańyzdylyǵyn eskere otyryp, Almaty ákimdigi jańa qujatpen jumys jasaý úshin qalanyń jetekshi sáýletshileri - S.Fazylov, N.Hamıtov, A.Aqpaı jáne basqa da bedeldi qala qurylysshylaryn shaqyrdy.
Buǵan deıin habarlanǵandaı, O.Jandosov, 94, 94/16, 94/8; Á. Kekilbaıuly k-si, 6; 20-lınııa k-si, 39 («Jemis konservi kombınaty» aýdany) mekenjaıyndaǵy jer ýchaskesindegi qurylys jobasyn júzege asyrý toqtatyldy.
Halyqqa qyzmet kórsetý nysandary bar kóppáterli turǵyn úı keshenin salý úshin jobalaý aldyndaǵy qujattama keri qaıtaryldy.
Sonymen qatar, osy jyldyń 26 sáýirine josparlanǵan jobanyń birinshi nusqasy boıynsha qorshaǵan ortaǵa áserdi baǵalaý boıynsha qoǵamdyq tyńdaýlar toqtatyldy.
Almaty qalasynyń kórsetilgen aımaǵynda qurylysqa jol berilmeıdi. Ózgertilgen jobany júzege asyrý múmkindigi tek kópshiliktiń talqylaýyna, qala turǵyndarynyń qoldaýyna ıe bolǵannan keıin ǵana qarastyrylady.
