Almatyda burynǵy tramvaı parki aýmaǵynda jastar ortalyǵy ashylmaq
ALMATY. QazAqparat - Almatyda qala jastaryn qoldaý úshin Jol kartasy jobasy jasalyp, burynǵy tramvaı parkiniń aýmaǵynda jastardyń loft-ortalyǵy ashylmaq, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Qalalyq ákimdiktiń habarlaýynsha, Jol kartasynyń mańyzdy bóligi - jastardyń mádenı demalýyn damytý.
«Osy maqsatta burynǵy tramvaı parkiniń aýmaǵynda jastardyń loft-ortalyǵy ashylatyn bolady. Munda jas almatylyqtar ózderiniń jobalary men shyǵarmashylyq ıdeıalaryn iske asyrady. Loft-ortalyq bazasynda memlekettik tildi oqytý ortalyǵy men English club, sheberhanalar, jastarǵa qyzmet kórsetetin ortalyqtar, kovorkıng ortalyqtar, oqý zaldary jumys isteıdi»,- delingen habarlamada.
Baǵdarlamada buqaralyq sportty damytýǵa laıyqty oryn berilgen. Baǵdarlama aıasynda iri sport sharalary uıymdastyrylyp, sport alańdary abattandyrylmaq. Jeńil atletıkalyq jáne velojoldar kóbeıip, sport zaldary, Workout-alańdary jańartylady. Sonymen qatar, baǵdarlamada jas otbasylardy turǵyn úımen qamtamasyz etýge qarjy bólý mehanızmderi de qarastyrylǵan.
Jol kartasy boıynsha loft-ortalyqtan ózge jastardyń 4 beıimdelý ortalyqtaryn, mansap ortalyǵyn ashý josparlanǵan.
Qalalyq ákimdiktiń habarlaýynsha, Jol kartasyn júzege asyrýǵa 2- 6 mlrd. teńge aralyǵynda qarjy bólinbek.
«Jastardy qoldaýdyń jol kartasy» qala úshin erekshe oqıǵa. Biz bul jobany túrli alańdarda, basqosýlarda belsendi túrde talqylap, óz usynystarymyzdy, qosymsha tolyqtyrýlardy engizetin bolamyz, kelesi aıda jobany megapolıs basshysy bekitedi dep oılaımyn. Memleket tarapynan jastarǵa degen mundaı qamqorlyq turaqty damyp kele jatqan qalamyzdy burynǵydan da tartymdy ári ómir súrýge jaıly etedi», - dedi jastar uıymdary komıtetiniń tóraıymy Aısýlý Ernııazova.
Aıta keteıik, búgingi kúni Almatyda jasy 14-35 aralyǵyndaǵy jastardyń sany 800 myń adam, ol megapolıs turǵyndarynyń 45%-y.
