Almatyda burynǵy tramvaı deposynyń ornyna qoǵamdyq keńistik jasaý boıynsha baıqaý jarııalandy

Uıymdastyrýshy - «Almaty qalasyn damytý ortalyǵy» AQ. Bul baıqaý «Almaty qalasyn damytý-2020» baǵdarlamasyn júzege asyrý aıasynda qolǵa alyndy.        

«Mundaı arhıtektýralyq baıqaý Qazaqstanda tuńǵysh ret jarııalandy. Onyń biregeıligi sol, buǵan qatysýǵa sáýletshilermen qatar, dızaınerler, jarnamalyq ágenttikter, shyǵarmashylyq sheberhanalar, qoǵamdyq uıymdar, volonterlar, sabaqtas mamandyq ıeleri, sondaı-aq, shyǵarmashylyq baǵyttaǵy joǵary oqý oryndarynyń stýdentteri shaqyrylady. Baıqaýǵa bir avtor bolyp ta, top bolyp ta qatysýǵa bolady», -delingen Almaty qalasy ákiminiń baspasóz qyzmetinen.      

Baıqaýdy ótkizýdegi basty maqsat - burynǵy tramvaı deposynyń aýmaǵyn abattandyrý, kórkeıtý boıynsha úzdik tujyrymdamalyq ıdeıalar men eskızdik jobalardy anyqtaý. 

Bul jerde ýrbanıstıka qaǵıdalary - aýmaqtyń qala turǵyndaryna qol jetimdiligi, jobanyń qorshaǵan ortanyń sáýlet-landshaftyq kelbetine sáıkestiligi saqtalýy tıis.   

Sondaı-aq, jobada ekologııalyq materıaldar, qarapaıym jáne únemdi konstrýktorlyq sheshimder qoldanylýy kerek. 

Buǵan deıin tramvaı deposy mańynda turatyn turǵyndar arasynda arnaıy saýalnama júrgizildi. Sonyń nátıjesi boıynsha, turǵyndardyń basym kópshiliginiń bul aýmaqtyń qoǵamdyq keńistikke aınalǵanyn qalaıtyndyǵy belgili boldy. ıAǵnı, bul aýmaq bos ýaqytty, ár túrli mádenı sharalardy, kezdesýlerdi ótkizýge bolatyn qoǵamdyq orynǵa aınalýy tıis.

Kólik ınfraqurylymdaryn qaıta jańartýǵa arnalǵan mundaı jobalar Nıý-Iorkte («Haı-Laın» saıabaǵy), Parıjde (Sena ózeniniń sol jaq jaǵalaýy) jáne basqa da qalalarda júzege asyrylǵan.  

Mundaı kóp maqsatty saıabaq Jeltoqsan-Maqataev-Muqanov-Jambyl kósheleri aýmaǵynda jalǵyz qoǵamdyq keńistikke aınalýy múmkin. Óıtkeni, bul aýmaqqa eń jaqyn gúl baǵy 2 shaqyrym jerde ornalasqan. Onyń ústine, depo aýmaǵyndaǵy eski ǵımarattardy súrip tastaýǵa degen qajettilik azaıady.

Baıqaý sharty boıynsha qatysýshylar qoǵamdyq keńistiktiń eskızdik jobasyn, jobanyń sıpattamasy men tujyrymdamasyn jáne jobanyń negizdemesin tapsyrýlary kerek.

Búginnen bastap, almatydc.kz jáne konkurs@cda.kz elektrondy poshtasy boıynsha ótinimder qabyldana bastady. Aldaǵy 2-11 qyrkúıek aralyǵynda onlaın daýys beriledi jáne Saraptaýshy komıssııa jiberilgen jumystardy baǵalaıdy. Baıqaý qorytyndysy 18 qyrkúıekte shyǵarylady.

Komıssııa quramyna halyqaralyq sáýletshiler men ýrbanıster endi. Olardyń qatarynda GehlArchitects dırektory Rıkardo Marını jáne Delfıı tehnıkalyq ýnıversıtetiniń professory Hıýgo Prımýs jáne basqalar bar.

Eger qatysýshyǵa elektrondy poshta arqyly habarlama jiberilse, onda onyń jibergen ótinimi qabyldanǵan bolyp sanalady. Barlyq baıqaýlyq ótinimder daýys berý úshin saıtqa jarııalanady. Baıqaý erejeleri saıtta jarııalanǵan.