Almatyda buryn sottalǵandar aryqtyń lıýkterin urlap kelgen
Qalalyq Polıtsııa departamentiniń habarlaýynsha, qylmysqa qatysty eki er adam ustaldy. Olar buryn aýyr qylmys istegeni úshin isti bolǵan.
«Ekeýi de 46 jasta. Bir-birin mektepten beri tanıdy. Olardyń bireýi «Gazel» kóligimen júk tasyp kelse, ekinshisi dánekerleýshi bolyp qyzmet jasaıdy. Kúdiktiler buryn aýyr qylmys jasaǵan. Biri - adam óltirip, sottalyp kelse, ekinshisi esirtki taratqany úshin isti bolǵan. Qazir olardyń basqa qylmystarǵa qatystylyǵy tekserilip jatyr. Atalǵan derek boıynsha QR QK 188-babymen sotqa deıingi tergeý bastaldy», - dedi Túrksib aýdandyq polıtsııa basqarmasynyń basshysy Dýman Aýhadıev.
Kúdiktiler jol boıyndaǵy aryqtyń betin jaýyp turatyn shoıyn lıýkterdi shyǵaryp «Gazel» kóligine tıep alyp, temir-tersek qabyldaıtyn oryndarǵa tapsyryp kelgen.
«Al urlanǵan zatty olar aýdandardyń birinde jóndeý jumystary júrip jatqandyqtan, jańasy ornatylyp jatyr dep sendirip satyp jibergen. Ony satyp alǵan kásipkerge aıyppul salyndy. Saýdagerdi qyzmettik lıtsenzııasynan aıyrý týraly usynys ta berildi», - dedi Dýman Aýhadıev.
Qalalyq Polıtsııa departamentiniń resmı ókili Saltanat Ázirbektiń aıtýynsha, urlanǵan zatty satyp alǵan tulǵalar úshin QR QK 196-baby boıynsha qylmystyq jaýapkershilik qarastyrylǵan.
Aıta ketý kerek, Almatyda tártip saqshylary káriz qudyǵynyń shoıyn qaqpaqtaryn urlaǵandarǵa qatysty málimetti habarlaǵan adamdarǵa syıaqy beriletinin jarııa etken bolatyn. Qalada urlanǵan nemese synǵan shoıyn qaqpaqtardyń kesirinen oqys oqıǵalar tirkelgen. 2016 jyly synǵan lıýktiń kesirinen taǵy bir jol apaty bolyp, almatylyq Ekaterına Parafıeva eki aıaǵynan aıyryldy.
