Almatyda buralqy ıt pen mysyq qalaı aýlanady
«Kúndelikti «Qalalyq veterınarııalyq qyzmet» KMK-niń 6 kezekshi brıgadasy qaraýsyz jáne qańǵybas janýarlardy aýlaý jumystaryn júrgizedi. Bıyl naýryz aıyna deıin aýlanǵan janýarlar ıeleri tabylǵanǵa deıin jáne jańa ıelerine berilgenge deıin 3 táýlik boıy qaraýda bolǵan. QR Veterınarııa salasyndaǵy Zańnamasyna sáıkes, kereksiz dep tabylǵan janýarlar dári-dármekpen uıyqtatylǵan. 2 naýryzdan bastap Qazaqstan Respýblıkasynyń «Janýarlarǵa jaýapkershilikpen qaraý týraly» Zańynyń qabyldanýyna baılanysty, qańǵybas jáne qaraýsyz qalǵan janýarlardyń sanyn retteý tártibi aıtarlyqtaı ózgerdi», - dedi Erlan Omarov.
Aıtýynsha, jańa erejege sáıkes, asa qaýipti juqpaly aýrýlary jáne agressııa belgileri bar janýarlardy qospaǵanda, aýlanǵan janýarlardy jansyzdandyrýǵa tyıym salynady.
«Aýlaý janýarǵa jaraqat salýdy jáne mertigýdi boldyrmaıtyn gýmandy tásildermen júzege asyrylady. Adam men janýardyń ómirine nemese densaýlyǵyna naqty qater tóngen jaǵdaılardy qospaǵanda, balalardyń qatysýymen janýarlardy aýlaýǵa jol berilmeıdi. Aýlaý janýarlarǵa zııan keltirmeıtin quraldarmen, oqshaýlanǵan tuzaqtardy, torlardy, geldik oqshaýlaǵyshy bar ilmekterdi qoldana otyryp júzege asyrylady», - dep túsindirdi spıker.
Sondaı-aq, ol vetqyzmettiń qyzmetkerleri jańa mamandandyrylǵan formamen jáne tıisti úlgidegi beıdjben qamtamasyz etilgendigin aıtty. Aýlanǵan janýarlardy tasymaldaý mamandandyrylǵan avtokólikpen júzege asyrylady.
«Aýlanǵan qańǵybas jáne qaraýsyz qalǵan janýarlar ýaqytsha ustaý pýnktine ákelinedi. Aýlanǵan janýarlardy qabyldaý, janýardy esepke alýdy qatań túrde veterınarlyq dáriger júrgizedi. Veterınarlyq dáriger janýarlardyń jaraqattary bar joǵyn anyqtaý úshin klınıkalyq tekserý júrgizedi, tańbanyń, mıkrochıptiń bolýyn skanerleıdi», - dep túıindedi spıker.
Buǵan deıin ekologııa, geologııa jáne tabıǵı resýrstar mınıstrligi úı janýarlaryn mindetti esepke alý 2023 jyldyń 1 qyrkúıeginen bastap engiziletinin málimdegen bolatyn.