Almatyda býkmekerlik keńseni kimder tonaǵany anyqtaldy
ALMATY. QazAqparat - Almaty polıtsııasy býkmekerlik keńseni tonaǵandardyń kim ekenin anyqtady, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, bul oqıǵa keshe tańǵy 4:30 shamasynda Tóle bı kóshesindegi býkmekerlik keńselerdiń birinde bolǵan.
Betperde kıgen úsh er adam mekemeniń kúzetshisin dýbınkamen, oıynshyq tapanshamen qorqytyp 700 myń teńgeni qoldy etken.
Olardyń áreketi syrtqy jáne ishki beınebaqylaýǵa túsip qalǵan.
«Bul derek biryńǵaı tergeý isi reestrine QR QK 191-baby boıynsha tirkeldi. Qylmysty ashýǵa Almaly aýdandyq ІІB qyzmetkerleri men ІІD krımınaldyq bólim qyzmetkerlerinen arnaıy operatıvtik top quryldy. Kúdiktilerdiń kim ekendigi anyqtaldy», - dedi ІІD resmı ókili Saltanat Ázirbek.
