Almatyda býkmekerlik keńse kúzetshisin sabap ketken kúdiktiler ustaldy
ALMATY. QazAqparat - Almatynyń Áýezov aýdanyndaǵy býkmekerlik keńseni tonamaq bolǵan úsh kúdikti ustaldy, dep habarlaıdy QazAqparat tilshisi Almaty qalasy Polıtsııa departamentiniń baspasóz qyzmetine silteme jasap.
Olar - 1989, 1992 jáne 1996 jyly týǵan er azamattar. Onyń ekeýi Qaraǵandy oblysynyń turǵyny, al bireýi Ózbekstan azamaty.
«Barlyq kúdikti azamattardy Almaty qalasy Polıtsııa departamentiniń krımınaldyq basqarma qyzmetkerleri Qaraǵandyda ustady», - dep habarlaıdy Departament polıtsııasynda.
Qazirgi ýaqytta kúdiktiler Almatyǵa jetkizilip, tergeý úshin qamaýǵa alyndy. Sot aldyndaǵy tergeý QR Qylmystyq kodeksiniń 192-baby 2-bólimi boıynsha qarastyrylady.
Aıta ketý kerek, 20 qańtarda Almatyda býkmekerlik keńseni tonamaq bolǵan úsh er adam kúzetshini aıaýsyz soqqyǵa jyǵyp ketken bolatyn. Qandy oqıǵa Abaı men Saın kósheleriniń qıylysyndaǵy «Parı-Match» býkmekerlik keńsesinde bolǵan.
Elaman Turysbekov
