Almatyda Búkilálemdik etnosport forýmy bastaldy
NUR-SULTAN. QazAqparat - Almaty qalasy ákimdigi qoldaýymen «Royal Tulip Almaty» qonaq úıinde Búkilálemdik etnosport konfederatsııasynyń «Rýhanı jańǵyrý. Ulttyq sportty damytý» ІІ Halyqaralyq etnosport forýmy bastaldy, dep habarlaıdy Qazaqparat tilshisi.
QR Ulttyq sport qaýymdystyǵy málim etkendeı forýmǵa QR Ulttyq sport qaýymdastyǵynyń qurmettti prezıdenti Qaırat Satybaldy, Búkilálemdik Etnosport konfederatsııasynyń basshysy Bilál Erdoǵan, Almaty qalasynyń ákimi Baýyrjan Baıbek, Túrkııanyń Jastar jáne sport mınıstri Mehmet Mýharrem Kasapoǵlý, Qazaqstannyń Mádenıet jáne sport mınıstri Arystanbek Muhamedıuly, Ulttyq sport qaýymdastyǵynyń prezıdenti, Parlament Májilisiniń depýtaty Bekbolat Tileýhan, Túrkııa Syrtqy ister mınıstriniń orynbasary ıAvýz Selım Qyran, Túrki tildes memleketter yntymaqtastyǵy keńesiniń tóraǵasy Baǵdat Amreev, Astana memlekettik qyzmet habynyń tóraǵasy Álıhan Baımenov sekildi laýazymdy tulǵalar qatysyp jatyr.
Álemniń 30-ǵa jýyq memleketinen jınalǵan 150-den astam etnosport delegatsııasynyń ókilderi eki kún boıy dástúrli oıyndar men sport túrlerin álemde damytý, Qazaqstanda ótetin І Búkilálemdik etnosport oıyndaryn ótkizý, Túrkııada 2020 jyly uıymdastyrylatyn IV Dúnıejúzilik kóshpendiler oıynyn jetildirýdiń joldaryn qarastyrady. Kezdesýde sondaı-aq basqa da álemdik etnosport salasynyń ózekti máseleleri talqylanyp jatyr. Al, forýmnyń ekinshi bóligi 20 sáýirge belgilengen.
Aıta keteıik, atalmysh sharanyń ótýine Túrik yntymaqtastyq jáne úılestirý agenttigi (TİKA) de qoldaý bildirip otyr. Al, halyqaralyq sharanyń Bas seriktesi - «Samuryq-Qazyna» ulttyq ál-aýqat qory».
Buǵan deıin Almatyda etnosport forýmy ótetindigin habarlaǵan bolatynbyz.
