Almatyda Búkilálemdik boks serııasynyń tanystyrylymdyq jekpe-jegi ótti

3 mınýttan 5 raýndyq bul jekpe-jekte alǵashqy bop sharshy alańǵa 54 keli salmaqta baq synaǵan Baǵdat Álimbekov pen Abdýllah Dúrsin shyqty. Qarsylasyn upaı sanymen utqan Baǵdattyń (50:45, 49:46, 50:45) jeńisti jolyn komandalas serikteri odan ary jalǵastyrdy. Olardyń arasynan Erjan Musafırov (61kg) kezdesýdi merziminen buryn aıaqtady. Birden soqqynyń astynda qalyp, 2 raýndta 2 ret nokdaýn alǵan Mehmet Topchakannyń jarysty odan ary jalǵastyra almaıtyna kózi jetken rıngtegi tóreshi jeńimpazdyń qolyn kóterdi. Bul jekpe-jekte Olımpıada chempıony Baqyt Sársekbaevtyń kezdesýine boks jankúıerleri erekshe qyzyǵýshylyq týdyrǵan bolatyn. Onýr Shıpaldy (73kg) 5 raýnd boıy óz baqylaýynda ustaǵan Baqyt jeńisti óz paıdasyna sheshe aldy (49:46, 49:46, 49:46). Al AІVA-nyń Búkilemdik boks serııasynyń talaby boıynsha "Astana arlandary" sapynda óner kórsetken ganalyq Maksvell Amponsah pen serbııalyq Mılýtın Stankovıch te senimdi aqtady. Maksvell Onder Ozgıýldi (48-47, 48:47, 47:47), Mılýtını marokkalyq Mohammad Ardjaýıdi (50:45, 48:47, 48:47) qapy qaldyrdy.