Almatyda Búkilálemdik aqparattyq qoǵam kúnine oraı halyqaralyq konferentsııa ótti
ALMATY. Mamyrdyń 25-i. QazAqparat /Erbol Azanbek/ - Qazaqstan sońǵy jyldary aqparattyq salada úlken jetistikterge qol jetkizdi.
Bul týraly búgin Almatyda Búkilálemdik aqparattyq qoǵam kúnine oraı ótkizilgen konferentsııa barysynda Halyqaralyq aqparattandyrý akademııasynyń bas dırektory Alekseı Tsehovoı aıtty, dep habarlaıdy QazAqparat.
«Aqparattandyrý salasynda bizdiń elimiz 81-shi orynnan 47-shi orynǵa kóterildi. Eń bastysy, bizde «Elektrondyq úkimet» portaly jumys isteıdi. Sonymen qatar bul portaldy damytý baǵytynda arhıtektýra boıynsha ulttyq keńes quryldy. Bul degenimiz, qoǵamnyń barlyq salasy aqparattyq keńistikte kórinis taýyp keledi degen sóz. Bunymen qatar, eń bastysy ınternet baǵasy tómendep keledi. Búginde ınternet arqyly kóptegen qyzmetterdi júzege asyrýǵa bolady», dedi A.Tsehovoı.
Qazaqstannyń ınternet qaýymdastyǵynyń atqarýshy dırektory Aleksandr Lıahovtyń aıtýynsha, qazirgi kezde qoǵamnyń kez-kelgen salasyn aqparattyq tehnologııalarsyz elestetý múmkin emes. «Bul suranysqa oraı aqparattyq tehnologııalar salasy da óz deńgeıinde damyp keledi», deıdi A.Lıahov.
